Токио Олимпиадасының қола жүлдегері каратэден ұлттық құрама тізгінін ұстады

Токио Олимпиадасының қола жүлдегері Дархан Асаділов каратэден Қазақстан ұлттық құрамасының бас бапкері қызметіне тағайындалды, деп хабарлайды Kazinform.

Агенттіктің Қазақстан каратэ федерациясына сілтеме жасап жазуынша, Дархан кәсіби спортта айтулы табысқа қол жеткізген. 

Бұл ретте Токио Олимпиадасындағы (-60 кг) қола жүлдені, әлем чемпионатының күмісі (2008) мен қоласын (2018), Гуанчжоудағы Азия ойындарының алтынын атап айтуға болады. 

Сондай-ақ ол – спорттың осы түріндегі ең беделді жарыс Karate-1 Премьер-лига бәсекесінің 8 дүркін жеңімпазы.

Дархан Асаділов осыған дейін Шымкент қаласындағы спорт мектебінде және Қазақстан жастар құрама командасында жаттықтырушы болған.

Асаділов үшін бас бапкер қызметіндегі алғашқы халықаралық жарыс мамырдың аяғында Ташкентте өтетін Азия чемпионаты болады.

Бас бапкердің алдағы мақсаты – Ұлттық құраманың жаттықтырушылар қосынын жасақтау, келесі жылы Жапонияда өтетін жазғы Азия ойындарына тыңғылықты дайындалып, жоғары нәтиже көрсету.

Мәтіннен қате тапсаңыз, бізге жазыңыз