Миы басының сыртында орналасқан қыз өлімнен қалай аман қалды?

Карли Толанд дүниеге келгенде, дәрігерлер оның өмірі тек 20 минутқа созылады деп кесіп айтқан. Алайда бір жарым жасар бүлдіршін әлі де аман жүр. Ол туылғанда миы бас сүйегінің сыртына шығып тұрған деп хабарлайды dailymail.co.uk сайтына сілтеме жасаған NUR.KZ порталы.

Дәрігерлер Карлиге "энцефалоцеле" деп аталатын диагноз қойған. Әдетте мұндай ауруы бар нәрестелер туыла салып көз жұмады екен. Ал Карли дертке бой алдырмаған жалғыз сәби дейді мамандар.

Джемма Маккускер Карлиге жүкті кезінде дәрігерлер оған ауру бала туатынын ескерткен. Тіпті диагнозын нақты қоя алмай, мұрыны маңдайында болуы мүмкін дегенді айтыпты.

"Біз мұндай ғажайыптың болатынына сенбедік. Бірақ қазір қызымыз өзге балалармен қатар дамып келеді. Тек әлі жүріп-тұра алмайды", - дейді Джемма Маккускер.