Әлемге әйгілі украиналық боксшы Василий Ломаченко туған қаласын қорғау үшін қолына қару алды (фото)

Бокстан екі дүркін Олимпиада чемпионы, екі дүркін әлем чемпионы әрі Еуропа чемпионы Василий Ломаченко Одесса облысындағы туған қаласын қорғауға келді, деп жазады championat.com-ға сілтеме жасаған KAZ.NUR.KZ тілшісі.

Әлемге әйгілі боксшы Одесса облысындағы Белгород-Днестровский қаласында туған. Ломаченконың аймақтық қорғау батальонына қосылғаны туралы қала мэрі Facebook парақшасында хабарлады.

"Белгород-Днестровский қаласында аймақтық қорғау батальоны құрылып, қаруландырылды. Біздің жауынгерлер туған қаласындағы тәртіпті сақтауға көмектесіп, диверсанттар мен тонаушыларды кіргізбейді. Олардың қатарында Василий Ломаченко да бар", - деп жазды қала мэрі Виталий Граждан.

Айта кетелік, Василий Ломаченко 2008 жылғы Бейжің, 2012 жылғы Лондон Олимпиадаларында топ жарған.

Ол кәсіби бокстан үш салмақ дәрежесінде әлем чемпионы саналады. Ресей Украинаға қарсы күш қолданған сәтте Ломаченко әлеуметтік желіге дұға жариялап, әлемде бейбітшілік болуын құдайдан тілеген болатын.