Өзбекстанда 17 мыңнан астам шенеунік жұмыстан қысқартылады

Өзбекстан президенті Шавкат Мирзиеев министрліктер мен ведомстволардың басшысы және өндірістік персоналының санын 17 447-ге (24 пайыз) қысқарту туралы жарлыққа қол қойды, деп хабарлайды KAZ.NUR.KZ Gazeta.uz сайтына сілтеме жасап.

Басылымның мәліметінше, Мирзиеев бүгін, 25 қаңтарда бұрын жарияланған әкімшілік реформаны жүзеге асыруға бағытталған "Республиканың атқарушы билік органдарының қызметін тиімді құру бойынша бастапқы ұйымдастыру шаралары туралы" жарлыққа қол қойды.

Құжатқа сәйкес, министрліктер мен ведомстволарда бюджеттік және бюджеттік емес қорлардан қаржыландырылатын 17 447 басқарушы және өндірістік персонал (жалпы санның 24 пайызы) қысқартылуда. Соның ішінде министрліктер мен ведомстволар басшыларының орынбасарларының саны 207-ден 144-ке немесе 30 пайызға қысқартылды.

Сондай-ақ алдын ала есептеулер бойынша 703 қызметтік көлік пен 10 ғимарат босатылады.

Бұл шаралар штат санын қысқарту есебінен 1,5 триллион сом, сондай-ақ автокөлік санын қысқарту есебінен 70 миллиард сом бюджет қаражатын үнемдеуге мүмкіндік береді деп күтілуде.

Басылымның мәліметінше, министрліктер мен ведомстволар қызметкерлерінің жалпы саны 56 573 бірлікпен шектелмек.

Өзбекстан президентінің жарлығымен министрліктер мен ведомстволардың бюджеттен тыс қаражаты есебінен қосымша штаттық лауазымдар енгізуге қатаң тыйым салынды.

Бұған дейін Өзбекстан басшысы Шавкат Мирзиеев Ташкент әкімі Жахонгир Артыходжаевты қаланың қысқа нашар дайындығына байланысты қызметінен босатқан еді. Сонымен қатар, ол Өзбекстан Энергетика министрінің орынбасары Шерзод Ходжаев пен "Жылу электр станциялары" кәсіпорнының басшысы Фарход Абдурахмановты қызметінен босатты.