Астанадағы орыс мектептері қазақшаланатын болды

Астана әкімдігі орыс тілді мектептерді кезең-кезеңімен қазақ тіліне ауыстыруды жоспарлап отыр. Бұл туралы КТК арнасына сілтеме жасаған NUR.KZ хабарлайды.

Аталған жүйемен жұмыс істеуді ата-аналар ұсынып отыр екен.

"1-сыныпқа келетін балалар сабақ барысында ақпаратты бастапқы қадамда 70 пайыз орыс тілінде және 30 пайыз қазақ тілінде оқитын болса, 5-сыныпқа барғанда оқыту тілі толық мемлекеттік тілге көшірілетін болады. Жаңа оқу жылында осындай сыныптарды 60 лицей негізінде ашпақпыз", -деді Білім беру басқармасының басшысы Әнуар Жаңғозин.

Одан бөлек, елордадағы екі мектеп енді электронды оқулықтармен оқиды екен. Сондай-ақ, бас қалада бес мектеп пен үш колледжге білім латын әліпбиінде берілетін болыпты.

Ал Астанадағы ұстаздардың еңбекақысы көтеріліп, орташа айлық есебі 150 мың теңге болатын болса, балабақша тәрбиешілерінің көмекшілеріне 20 мың теңге қосылады екен.

Алдағы бес жылда елордада тағы 120 мың оқушы мектеп табалдырығын аттамақ.