RU

Ауырып қалғанын айтқан Мұхамеджан Тазабек халықты сақ болуға шақырды

Ақын Мұхамеджан Тазабек он шақты күннен бері ауырып жатқанын айтты. Ақ халаттыларды күтіп отырған айтыскер бұйырған шешімге көнетінін жеткізді деп хабарлайды KAZ.NUR.KZ.

"Қызу түспеді": Мұхамеджан Тазабеков он шақты күннен бері ауырып жатыр
Мұхамеджан Тазабек. Фото: mukhamedzhan_tazabek: Facebook

Ақын өз денсаулығы жайлы Instagram парақшасында жазды.

"Оншақты күн үй жағдайында ем алып көріп едік, көнбеді. Екі өкпе бірдей қабынып, екі иықтан дем алып, есті шығарған сәттер күнәмізді төгіп, Құдай алдындағы дәрежемізге себеп болса екен...

Қызу түспеді, қол-аяқ пен бұлшық еттің қақсағаны қоймады. Дәрігерлер таңертең тағы келмекші. Бұйырған шешімге бас қоярмыз, Алла қаласа. Ауырмаңыздар, сақ болыңыздар! Індет іргеңізге кеп қалған болса, Алла шипа берсін, сабыр берсін!

Дүниедегі ең қымбат деген дәрі де сіз бен біздің дұғамыздан пәрменді емес, деп ойлаймын!", - деді ол. ⠀ Тазабеков жанұясымен ауырып, көз жұмып жатқандарды да атап өтті.

"Біреулер отбасымен ауырып, біреулер ана дүниеге аттанып та кетіп жатыр. Аз қазақты көбейте алмай жүргенде, бұл дерт те дегенін істемесе екен. Әйтсе де, Алла қалағанынан артық ешнәрсе болмайды. Алланың тағдырына ризамыз!

Жаратқанға жалбарынғанда бізді де қаперлеріңізден тастамассыздар! Дұға-тілектер қабыл болып, ел мына жұқпалы дерттен тезірек бойын тазартса екен! Шипа беруші Алла баршамызға шипа берсін!", - дейді Мұхамеджан Тазабек.

Айта кетейік, бұған дейін белгілі тележүргізуші Динара Сәтжан да ауырып жатқанын, коронавирусқа тексерілмек ойда екенін хабарлаған еді.

Мақаланың түпнұсқасы: https://kaz.nur.kz/1862612-auyryp-kalganyn-ajtkan-mhamedzan-tazabek-halykty-sak-boluga-sakyrdy.html