Қостанайда полиция көлігі соққан машинадағы бала көз жұмды

Қостанай облысында полицияның патрульдік автокөлігі "ВАЗ 2115" маркалы көлікпен соқтығысты деп хабарлайды KAZ.NUR.KZ ҚазАқпарат агенттігіне сілтеме жасап.

Ақпаратты облыстық полиция департаментінің баспасөз қызметі растады. Оқиға бүгін сағат 16:00-де Қостанай-Рудный автожолының 10-шақырымында болған.

"Полиция патрулінің автокөлігі "ВАЗ 2115" көлігіне соқтығысты. 4 жасар бала оқиға орнында қаза болды. Жедел-тергеу тобы оқиға орнын тексерді. Қызметтік автопатрульдің осы жолдың 17-шақырымында болған жол апатына бара жатқаны анықталды.

Бірер сағат бұрын тағы бір "ВАЗ 2115" көлігінің 26 жастағы жүргізушісі рөлге ие бола алмай, жолдан шығып кеткен болатын. Салдарынан екі адам көз жұмды. Бұл дерек бойынша Қылмыстық кодекстің 345-бабымен іс қозғалды", - дейді полицияның баспасөз қызметі маманы Кенже Қонысбай.

Қазір жол-көлік оқиғасы бойынша қызметтік тексеру басталды. Патруль көлігі жол үстінде дабыл белгісін қосып жүрген.

Айта кетейік, осыған дейін әлеуметтік желіде "халыққа химиялық у шашылып жатқаны" жөнінде жалған ақпарат таратқан қостаналайлық әйел анықталғанын хабарлаған едік.

Қазір оған қатысты Қылмыстық кодекстің 274-бабы бойынша сотқа дейінгі тергеу амалдары жүріп жатыр. Бұл бап қасақана жалған ақпарат тарату қылмысы үшін жазаға тартуды көздейді.