RU

Қарулы Күштердің жеке құрамы қарияларды қарттар күнімен құттықтады

Қорғаныс1
Фото: ҚР Қорғаныс министрлігі

Алматы қаласы Қорғаныс істері жөніндегі департаментінің әскери қызметшілері Ұлы Отан соғысының ардагерлерін құттықтады. Жыл сайынғы дәстүр бойынша бұл күні Ұлы Отан соғысының ардагерлері мен тыл еңбеккерлеріне ерекше көңіл бөлінеді.

Ардагерлердің көбі 90 жастан асқан. Кейбіреулері өздігінен қозғала алмайды. Бірақ олардың арасында ән айтып, қызықты естеліктерімен бөлісетіндері де бар.

Мереке күні әскери қызметшілер 95 жастағы Ұлы Отан соғысының ардагері Николай Васильевич Николаевқа барды. Ол 180-ші атқыштар дивизиясының құрамында соғысқан. "ІІ дәрежелі Отан соғысы Орденімен", "Германияны жеңгені үшін" және Жуков медалімен марапатталған. Ардагер әскери қызметкерлерді жылы қабылдап, көңіл бөліп келгендеріне алғысын айтты.

Қорғаныс1
Фото: ҚР Қорғаныс министрлігі

Полковник Нұрмолда Атамбайұлы Батырбеков 97 жаста. Ол жауынгерлік жолын Украина майданының 266-шы атқыштар полкінен бастап, 1942-1945 жылға дейін 120 милиметрлік полк минометтерінің майдан минометшісі болды. Қиян-кескі шайқастарда ол жарақат алып, есінен айырылды. Ардагер I және II дәрежелі Отан соғысы ордендерімен, "Ерлігі үшін", "Германияны жеңгені үшін", "Жеңіске 20 жыл", "Тың игергені үшін" медальдарымен марапатталған.

Полковник Сәрсенов Қамбар Әмірұлы "II және III дәрежелі Даңқ", "I және II дәрежелі Отан соғысы", "Қызыл Жұлдыз" ордендерімен, "Жауынгерлік еңбегі үшін", "Кенигсбергті алғаны үшін", "Германияны жеңгені үшін" медальдарымен марапатталған.

Қорғаныс1
Фото: ҚР Қорғаныс министрлігі
"Ең бастысы, қарт адамдарға біздің назарымыз қажет. Олар өздері бастан кешкен оқиғаларын айтып, әрқашан әскерилерді қуанышпен қарсы алады. Біз олармен әрдайым байланыстамыз. Әрқашан көмектесіп, олардың денсаулығына көңіл бөлеміз", – деп атап өтті Алматы қаласының қорғаныс істері жөніндегі департаментінің бастығы полковник Амантай Өсербаев.

Атап өткен жөн, әскерилер қарияларға тек мереке күндері ғана емес, әр уақытта назар аударуға тырысады. Олармен тығыз байланыс орнатып, күнделікті тіршіліктеріне қол ұшын созып, қолдау көрсетеді.

Мақаланың түпнұсқасы: https://kaz.nur.kz/1877378-karuly-ksterdi-zeke-kramy-karialardy-karttar-knimen-kttyktady.html