Айзат Әбдісамат қаза тапқан лифтіге жауапты механик бостандыққа шықты

Осыдан біраз уақыт бұрын Ақтөбеде көп қабатты үйлердің біріндегі лифт істен шығып, журналист Айзат Әбдісамат жедел сатыға қыстырылып, қаза тапқан болатын. Осы қазадан кейін төрт жылға сотталған лифтер-механик Жарылқасын Ақжановқа шыққан үкім өзгеріп, оның жазасы бас бостандығын шектеумен алмастырылған деп хабарлайды aktobenews.kz.

"Апелляциялық шағымнан соң механик Жарылқасын Ақжановтың жазасы бас бостандығын шектеумен алмастырылған. Апелляциялық алқа қаулысы 27 желтоқсан күні күшіне енді", - деп хабарлады облыстық сот.

Биыл 19 қазан күнгі қалалық сот үкіміне сай кісі өлімі болған көпқабатты үйге жауапты "Жаңабек -Сервис" пәтер иелері кооперативінің төрағасы Кенен Жаңабеков 4 жылға шартты түрде сотталған.

Судья үкім шығарарда "Жаңабеков кінәсін мойындап, жәбірленуші тараптан кешірім сұрағанын, моральдық шығындарын өтегені ескерілгенін" айтқан.

Ал жалдамалы меxаник Жарылқасын Ақжанов 4 жылға сотталып, сот залынан қамауға алынған болатын.

Бірақ Ақжанов жарыссөзде өзін кінәсіз санайтынын мәлімдеген және сот үкімімен келіспеген. Кейін апелляциялық шағым түсірген.

Айта кетейік, қайғылы оқиға Ақтөбе қаласындағы 12-ықшамауданындағы он қабатты №19 үйдің 2-подъезінде биыл 4 сәуір кешкі сағат тоғыздар шамасында болған.

Үйдің алтыншы қабатында тұратын жергілікті телеарна журналисі Айзат Әбдісамат лифтіде қысылып қалып, қаза тапқан еді.