Ақтөбе облысында локомотив пен жолаушылар пойызы соқтығысты: полиция қылмыстық іс қозғады

Бүгін Ақтөбе облысының Біршоғыр станциясында маневрлық локомотив Бішкек-Самара бағытындағы жолаушылар пойызымен соқтығысқан еді. Осыған байланысты қылмыстық іс қозғалды. Бұл туралы Ішкі істер министрлігі Telegram арнасында хабарлады.

Маневрлік локомотив пен жолаушылар пойызы 5 наурыз күні сағат 10:20 шамасында соқтығысқан.

Полицияның хабарлауынша, аталған дерек Қандыағаш станциясындағы Желілік полиция бөлімінің сотқа дейінгі тергеп-тексерудің біріңғай тізіліміне Қылмыстық кодекстің 344-бабы 1-бөлігі "Темiржол көлiгi жүрісі немесе оларды пайдалану қауіпсіздігі қағидаларын бұзу" бойынша тіркелді.

"Зардап шеккендер жоқ. Қазіргі уақытта тергеп-тексеру жүргізіліп жатыр", - деп хабарлады ведомстводан.

Өзге ақпараттар Қылмыстық-процестік кодекстің 201-бабының талаптарына сәйкес жария етілмейді.