Астанада кіреберістегі қабырға опырылып, жасөспірімнің үстіне құлап кете жаздады (видео)

Астанадағы көпқабатты үйде қабырғаның бір бөлігі опырылып, лифтке кірген балалардың бірінің үстіне құлап кете жаздады. Мүлік иелері бірлестігінің төрағасы барлық кемшілік жақын арада жойылатынын мәлімдеді. Бұл туралы "Еуразия" Бірінші арнасы хабарлады.

Телеарна хабарлауынша, бейнебақылау камерасының жазбаларында төрт бала лифт күтіп тұрады. Кейін олар лифтке кіріп кеткенде бірнеше секундтан кейін қабырғаның опырылған бөліктері еденге құлап түседі.

"Әрине, мен қорықтым. Басына қабырғаның бөлшегі түсіп кетсе, балаға не болар еді?! Бұрын да осының бәрі құлаған, жапсырып, қалпына келтіріп қойған едік. Материалдардың сапасы төзімді болса, жақсы болатын еді", - деді жасөспірімнің анасы Әсия Балмағамбетова телеарна тілшілеріне.

Мүлік иелері бірлестігінң төрағасы оқиға туралы құрылыс салушыға хабарланғанын айтып, алдағы уақытта кемшіліктерді жоюға уәде берді.