Павлодар облысында оқушы қызды жүкті қылған жасөспірім жазадан құтылып кетті

Ақсуда 15 жастағы оқушы қызды жүкті қылған 17 жастағы бала ата-аналары бітімге келген соң, қылмыстық жазадан құтылып кетті. Бұл туралы облыстық полицияға сілтеме жасаған KAZ.NUR.KZ хабарлайды.

Павлодар облыстық полиция департаментінің хабарлауынша, 15 жастағы оқушы қыздың жүкті екені Ақсу қаласындағы әйелдер консультациясында жүргізілген тексеру кезінде анықталған.

Бұл факт бойынша полицейлер Қылмыстық кодекстің 122-бабы "Он алты жасқа толмаған адаммен жыныстық қатынас немесе сексуалдық сипаттағы өзге де әрекеттер жасау" бойынша қылмыстық іс қозғаған.

"Қылмысты ашу кезінде оны 17 жастағы Ақсу қаласының тұрғыны жасағаны анықталды. Қылмыстық іс ақталмайтын негіздер бойынша тоқтатылды.

Екі жасөспірімнің ата-анасы 127-бап "Кәмелетке толмаған адамды тәрбиелеу және (немесе) оған білім беру, оның құқықтары мен мүдделерін қорғау жөніндегі міндеттерді орындамау" бойынша әкімшілік жауапкершілікке тартылды", - деді Павлодар облысы ПД Жергілікті полиция қызметі басқармасының ерекше тапсырмалар жөніндегі аға инспекторы Бибігүл Қамзина.

Полиция бұл іс бойынша ақталмайтын негіздер тараптардың татуласуы болғанын атап өтті.