ШҚО-дағы шахтада тағы бір жұмысшы қаза тапты

Шығыс Қазақстанда тағы да қайғылы жағдай болып, бір жұмысшы қаза тапты. Оқыс оқиға "Артемьев" шахтасында болған, деп хабарлайды KAZ Minerals.

"1 қыркүйекке қараған түні "Артемьев" шахтасында тастың құлауы салдарынан мердігер ұйымының үңгушісі жарақат алып, қайтыс болды", - делінген хабарда.

KAZ Minerals мән-жай мен себептері анықталып жатқанын, қайғылы жағдайларды тергеу бойынша арнайы комиссиялар құрылғанын мәлімдеді. KAZ Minerals тобы директорлар кеңесінің төрағасы Олег Новачук жазатайым оқиғаларды тергеуге қатысу үшін өңірге барған.

"KAZ Minerals тобының басшылығы мен ұжымы қаза тапқандардың туыстары мен жақындарына қайғырып, көңіл айтады. Компания отбасыларға жан-жақты көмек көрсетеді", - делінген хабарда.

Еске салсақ, 31 тамызда "Ертіс" шахтасында ауысым кезінде белгісіз затпен улану белгілері бар төрт жұмыскердің денесі табылды. Тағы бір адам ауруханаға жатқызылды.

Осыдан кейін Еңбек және халықты әлеуметтік қорғау министрлігі арнайы комиссия құрылғанын хабарлады.