СҚО-да квадроцикл аударылып, төрт жасар бала қаза тапты

Бүгін, 19 қыркүйекте таңертең СҚО-да жүргізуші тізгінге ие бола алмай қалып, квадроцикл аударылып қалды. Кішкентай жолаушы алған жарақатының салдарынан көз жұмды, деп хабарлайды облыстық полиция департаментіне сілтеме жасаған KAZ.NUR.KZ.

Ведомствоның баспасөз қызметінің мәліметінше, оқиға 19 қыркүйекте таңертең сағат 10.30 шамасында Солтүстік Қазақстан облысының Аққайың ауданында болған.

"56 жастағы ер адам үйінің ауласында Polaris квадроциклін жүргізіп келе жатып, рульді басқара алмай, квадроцикалды аударып алған", - деп хабарлады облыстық полиция департаменті.

Оқиға салдарынан 4 жасар бала орталық облыстық ауруханаға жеткізіліп, алған жарақаттарынан қаза тапты. Квадроцикл жүргізушісі де ауруханаға жатқызылды.

Қылмыстық кодекстің 345-бабының 3-бөлігі бойынша іс қозғалды. Қазір тергеу амалдары жүргізіліп жатыр.