Алматыда мопедтен құлаған жасөспірімді экскаватор басып кетті

24 қазанда таңертең Алматыда мопедтен жол бойына құлап кеткен жасөспірімді экскаватор басып қалды. Оқиға салдарынан 16 жастағы қазақстандық қаза тапты, деп хабарлайды KAZ.NUR.KZ.

Алматы полициясы өкілдері оқиғаның мән-жайын KAZ.NUR.KZ тілшісіне айтты. Қайғылы оқиға бүгін, 24 қазанда сағат 8.10-да Алатау ауданында болды.

"Алғабас ықшамауданында Доспанова көшесімен солтүстік бағытта келе жатқан 15 жастағы жасөспірім сол бағыттағы көлікпен соқтығысқан. Салдарынан мопед аударылған. Кейін соқтығыс салдарынан жол жиегіне құлаған 16 жастағы мопед жолаушысы экскаваторға соғылған", - деп хабарлады Алматы полиция департаментінің баспасөз қызметі.

Өкінішке қарай, жасөспірім алған жарақатынан оқиға орнында көз жұмды.

Адам өліміне әкелген жол-көлік оқиғасы бойынша сотқа дейінгі тергеу басталды.