Астанада алты көлік бір-біріне соқтығысты

Астанада BMW көлігінің жүргізушісі тізгінге ие бола алмай, жол апатын жасады – тағы 5 көлікке зақым келді. Бұл туралы мегаполистің полиция департаментіне сілтеме жасаған KAZ.NUR.KZ хабарлайды.

Жол-көлік оқиғасы бүгін Астанадағы Сығанақ көшесінде болды.

"Сығанақ көшесімен келе жатқан BMW көлігінің жүргізушісі Нәжімеденов көшесіне қарай бағыт алатын көпірде тізгінге ие бола алмай қалып, басқа бес көлікпен соқтығысқан. Жол-көлік оқиғасынан зардап шеккендер жоқ", - делінген елордалық полиция департаментінің Telegram-дағы ресми арнасында жарияланған хабарламада.

BMW жүргізушісіне қатысты материалдар Астана қаласының мамандандырылған ауданаралық әкімшілік сотына жіберілді.

Еске салсақ, бұған дейін Астанада Сығанақ пен Тұран көшелерінің қиылысында жолаушылар мінген екі автобус бір-біріне соқтығысқанын жазған едік. Оқиға салдарынан екі адам зардап шекті, олардың бірі – кәмелетке толмаған бала.