Павлодарда жол апатынан бір қыз қаза тауып, екі жасөспірім зардап шекті (видео)

Жексенбі, 24 қарашаға қараған түні Павлодарда Mercedes-Benz көлігі жол апатына ұшырады. Салдарынан бір адам қаза тауып, екі жасөспірім ауыр жарақат алған. Бұл жөнінде Pavlodarnews.kz сайтына сілтеме жасаған KAZ.NUR.KZ хабарлайды.

Павлодар облысының полиция департаменті өкілдерінің журналистерге берген мәліметі бойынша, оқиға 24 қараша сағат 03:10-да болған.

Полицейлердің айтуынша, Mercedes-Benz көлігінің жүргізушісі Н.Назарбаев даңғылы бойымен келе жатып, жылдамдықпен жол жиегіне шығып кеткен, кейін ағашқа соғылған.

Жүргізуші мен үш жолаушы түрлі жарақатпен ауруханаға жеткізілді.

Облыстық балалар құқықтары жөніндегі уәкіл Сәуле Шәкеневаның хабарлауынша, 16 жастағы жолаушы алған дене жарақаттарынан көз жұмған. Ал 15 жастағы қызға ота жасалып, қазір жансақтау бөлімінде жатыр. 14 жастағы жасөспірім облыстық балалар ауруханасына жеткізілді.

Басылым кәмелетке толмағандардың түнгі уақытта заңды өкілдерінсіз үйден шығуға жол берген ата-аналардың әрекетіне құқықтық баға берілетінін атап өтті.