6 жолаушы зардап шекті: Алматыда автобус пен тепловоз соқтығысты (видео)

Әлеуметтік желіде Алматыда автобус пен тепловоз соқтығысқан оқиға орнынан видео жарияланды. Жол апатына қалалық полиция департаментінің баспасөз қызметі түсініктеме берді, деп хабарлайды KAZ.NUR.KZ.

Видео Telegram-дағы "Мой Алматы" арнасында жарияланды. Видеоның астындағы жазбада Гоголь көшесіне жетпей, Әуезов көшесінде автобус тепловозбен соқтығысқаны жазылған.

Алматы қалалық ПД баспасөз қызметінен KAZ.NUR.KZ тілшісіне хабарлағандай, бұл жол-көлік оқиғасы бүгін сағат 11:40-та Алмалы ауданында болды.

"Жеке тасымалдаушыға тиесілі №88 бағыттағы автобус Әуезов көшесімен солтүстік бағытта Гоголь көшесінің солтүстігінде келе жатып, батысқа қарай темір жол бойымен келе жатқан тепловозға соқтығысты.

Оқиға салдарынан қоғамдық көліктің 6 жолаушысы зардап шекті. Оларға медициналық көмек көрсетілді", - делінген хабарламада.

Оқиғаның басқа мән-жайлары анықталып жатыр.