Қарағанды зауытындағы апат: зардап шеккендер ауруханаға неге жедел жәрдем көлігімен жеткізілмеген

Денсаулық сақтау министрі Ақмарал Әлназарова Қарағандыдағы ферроқорытпа зауытында жарақат алған жұмысшылардың ауруханаға неге жедел жәрдем көлігімен жеткізілмегенін айтты. Бұл туралы KAZ.NUR.KZ тілшісі хабарлайды.

Үкімет отырысы аясында өткен баспасөз мәслихатында журналистер күйік шалған ферроқорытпа зауытының қызметкерлері ауруханаға неліктен жедел жәрдем көлігімен жеткізілмегенін сұрады.

"Әлеуметтік желіде ферроқорытпа зауытынан видеолар тарады. Видеодан олардың жедел жәрдем көлігімен емес, басқа транспорт түрімен алып бара жатқанын көруге болады. Жәдел-жәрдем көліктері қайда болды?", - деп сұрады БАҚ өкілі.

Бұған жауап берген Әлназарова зардап шеккендерге қажетті медициналық көмек көрсетілгенін айтты.

"Үлкен трагедия болды, зардап шеккендер бар. Қажетті медициналық көмек көрсетілді. Қысқа уақытта травмотология орталығы директорының басқаруымен бригада ұйымдастырылды. Біз тарапымыздан науқасты уақытында жеткізу бойынша анализ жасайтын боламыз", - деді ол.

Журналистер "күйік кезінде таза емес көлікте жараға инфекция түспей ме?" деп нақтылады.

"Медициналық жедел жәрдем келгенде бірінші терапия жасалатын еді. Бірақ олар жедел жәрдем көлігін күтпеген. Бұл форс-мажор жағдай, осы себептен осы көлікпен жеткізуге шешім қабылданған. Науқас жеткізілген медициналық орталық қолдан келгеннің бәрін жасады. Бірақ науқастардың жағдайы өте ауыр болды. Өндірістен ауыр жарақат алған", - деді ол.