Қарқаралыдағы өрт: дәрігерлер зардап шеккендердің жағдайын баяндады

Қарағанды облысының Денсаулық сақтау басқармасы өкілдері дала өртін сөндіру кезінде күйік шалған 4 өрт сөндірушінің жағдайына қатысты мәлімдеме жасады, деп хабарлайды Кazinform.

Зардап шеккендер келіп түскен орталық басшысы оларға қажетті көмек көрсетіліп жатқанын айтты.

"Қарқаралы ауданының Шөптікөл ауылының маңында дала өртінің салдарынан төрт адам зардап шекті. Төртеуі де Қарқаралы аудандық орталық ауруханасына жатқызылды. Содан кейін олар бізге, Мақажанов атындағы клиникаға жеткізілді. Барлық зардап шеккендерге қажетті көмек көрсетіліп жатыр Қазіргі уақытта науқастардың жағдайы тұрақты", - деді Мақажанов атындағы көпсалалы аурухананың травматологиялық орталығының басшысы Берік Төлеубаев.

Еске салсақ, кеше өрт сөндірушілер Қазақстанның екі облысында құрғақ шөптің жануын сөндіріп жатқаны туралы хабарлаған едік.

Ал бүгін Қарағанды облысы Қарқаралы ауданындағы дала өртін сөндіру кезінде 24-өрт сөндіру бөлімінің аға өрт сөндіруші-құтқарушысы Хали Хайрат қаза тапқаны мәлім болды.