Top.Mail.Ru

Сайт нұсқасы

ru kz

Зектілері

Аптап ыстықтан қалай қорғануға болады: Отандық дәрігерлердің кеңесі

Опубликовано:

Фото
Көрнекі фото: pexels.com

Елордада аптап ыстық тағы бірнеше күнге созылады. Жоғары температура әсіресе балалар, қарттар мен жүрек-тамыр аурулары бар адамдар үшін қауіпті. Осыған байланысты Нұр-Сұлтан қаласының дәрігерлері осы кезеңде тұрғындарды өз денсаулығына мұқият болуға және бірнеше ережені сақтауға шақырады деп хабарлайды қала әкімдігінің ресми сайты.

"Мұндай ауа-райында таңертең жұмысқа шығар алдында душ қабылдау қажет. Суы салқындау, алайда қолайлы температурада болуы тиіс. Осылайша, адам ағзасы біршама салқындайды", — деді №10 қалалық емхананың жалпы практика дәрігері Наргиз Абдурайымова.

Оның сөзінше, ауа райына сәйкес киінген жөн. Тар немесе тырысып тұратын киімдерді таңдамаған абзал, ең дұрысы ақшыл түсті, жеңіл, кең тұратын және ауа өткізетін матадан тігілген киімдер киген дұрыс.

Сонымен қатар, дәрігердің ұсынысы бойынша серуендеу үшін таңертеңгі 10-ға дейінгі және күндізгі 17:00-ден кейінгі қауіпсіз уақытты таңдау керек.

Күннің қатты ыситын кезеңі — сағат 11:00-17:00 аралығы.

Егер осы кезеңде көшеге шығу қажет болса, онда жолдың көлеңке жағымен жүрген абзал. Ашық жерде екі сағаттан артық жүрер болса адам басынан күн өтіп кетуі ықтимал.

"Мұндай кезде адамда жүрек айну, бас айналу және жүрек соғуының жиілеуі мүмкін. Терісінің түсі бозарса, бұл – жылу соққысының, ал қызарса – күн өтіп кеткеннің белгісі. Егер мұндай белгілер пайда болса, көлеңке жерге немесе ғимарат ішіне кіріп демалып, мүмкіндігінше көп су ішу керек", — деп түсіндірді дәрігер.

Дәрігердің сөзінше, сусын таңдағанда қарапайым су немесе жеміс сусыны мен компот ішкен дұрыс екен. Ал шай ішетін болсаңыз, оны бөлме температурасына дейін салқындатқан жөн.

"Аптап ыстықта тамақты көп ішпеген дұрыс. Бірақ аш жүрмеу керек, ең дұрысы әр екі-үш сағат сайын жақсы тамақтану қажет. Тамақ ыстық емес әрі жеңіл болуы керек. Ет пен балықтың майсыз түрі, салқындатылған сорпа, көкөніс пен жеміс жеуге болады. Қуырылған тағамдар мен алкогольден аулақ болып, сондай-ақ қою шай, кофе, әсіресе газдалған тәтті сусындарды қолданбаған абзал", — дейді Наргиз Русланқызы.

Қорытындылай келе дәрігерлер бөлмені жиі желдетіп, күн қатты ысыған кезде терезелерді қалың матамен жауып қоюды кеңес етті.

Мақаланың түпнұсқасы: https://kaz.nur.kz/kaleidoscope/1920837-aptap-ystyqtan-qalai-qorganuga-bolady-otandyq-darigerlerdin-kenesi/

pixel