Жаңғақ қосылған бәліш: ауызашарға Арианадан дәмді десерт

Жаңғақ қосылған бәліш ауызашар дастарханының таптырмас десерті болады. Бүгінгі материалда дәмі тіл үйіретін жаңғақ бәлішінің рецептін бөліспекпіз.

Жаңғақ бәлішінің ерекше рецептін фудблогер Нариман Ариана ұсынып отыр. Фудблогердің YouTube арнасынан көптеген дәмді десерт пен ерекше тағамдар рецептімен таныс бола аласыздар.

Сипаттамасы

Асхана: Еуропа

Санаты: десерт

Дайындалатын уақыты: 20 минут

Дайын болу уақыты: 40 минут

Құрамы

Ұн - 250 гр.

Сары май - 130 г.

Жұмыртқа - 1 дана.

Қант - 50 гр.

Қопсытқыш - 1 ас қасық

Грек жаңғақ - 200 г.

Қоюлатылған сүт - 250 гр.

Дайындалуы

1. Қамыр илейміз

Ұнды електен өткізіп, ыдысқа салып, сары майды қосамыз. Қант пен қопсытқышты себеміз. Осылайша ұсақ үгінділер жасап, қамырды илей бастаймыз. Үстінен бір жұмыртқаны қосып, жұмсақ қамыр илейміз.

2. Қамырды формаға саламыз

Жұмсақ қамырды формаға біркелкі етіп жайып, салмасын салуға дайындаймыз. Қамыр біркелкі болып жайылу үшін, орташа мөлшердегі форманы таңдағаныңыз жөн болады.

3. Үгітілген грек жаңғағын саламыз

Грек жаңғағын үккіштен өткізіп немесе оқтаумен ұсақтап, дайындап аламыз. Үгітілген жаңғақты қамырдың үстінен саламыз. Біркелкі етіп жаямыз.

4. Қоюлатылған сүтті құямыз

Қоюлатылған сүтті жаңғақтың үстінен құямыз. Сосын қасықпен тегістеп, біркелкі етіп жайып шығамыз.

5. Бәлішті пісіреміз

Пешті алдын ала 180 градусқа дейін қыздырып аламыз. Сосын бәлішті қойып, 35-40 минутта пісіреміз. Осылайша жаңғақ бәліші дайын болып шығады.