Жабайы аралардан қалай құтылуға болады: үйге кірген жәндіктерден арылудың тиімді әдістері
Жарияланған күні:
![Жабайы ара Жабайы ара](https://cdn.nur.kz/images/1120x630/7010f93cca3e1f91.jpeg)
Жаз мезгілінде жабайы аралар көбейеді. Жабайы араның шағуы адамдар үшін қауіпті. Зиянкестерге қарсы күрес жөніндегі сарапшы Пеппер Моран және Good Housekeeping медиа бренді мұндай жәндіктерден қалай құтылуға болатынын айтты.
Ара ұясын жоюдың механикалық әдісі
Жабайы аралар күй талғамайтын жәндіктер болып саналады, сондықтан олар ұяларын барлық жерде салады: мысалы, үйдің шатырының астына, қабырғаларға, терезелердің астына, балкондар мен террасаға, жерге де сала береді. Үй қабырғасына ұя салған аралардан қалай құтылуға болады? Ол үшін олардың ұяшықтарын тауып, бұзыңыз. Зиянкестермен күресу бойынша сарапшы Пеппер Моран араларды бақылауды ерте көктемде, яғни жәндіктер енді оянып жатқан кезде бастауға кеңес береді.
Мына әдісті рет-ретімен жасаңыз:
- Қалың материалдан жасалған киім мен омарташының арнайы маскасын тағыңыз. Қолыңызға қалың резеңке қолғап пен аяғыңызға жабық әрі биік аяқ киім киіңіз.
- Қабырғадағы бір тесіктен басқасының барлығын бітеңіз.
- Кешке қарай ұяға тесік арқылы арнайы спрей шашыңыз. 2-6 м қашықтыққа себуге арналған жоғары қысымды аэрозольдерді таңдаңыз.
- Бір тәулік өткеннен кейін қабырғаны немесе ара ұясын түртіп көріңіз. Егер гуіл болмаса, аралар өлді деген сөз.
Өлі аралар тұрған ұяларды алып тастауға тырысыңыз және оларды тастаңыз. Егер ұя қол жетпейтін жерде болса, басқа жәндіктер қабырғаға өрмелемеу үшін саңылауларын бітеп тастаңыз.
![Ара желімі Ара желімі](https://cdn.nur.kz/images/1120/a4fa1981d20a2aaa.jpeg)
Инсектицидтер қосылған жем
Араларды қалай улауға болады? Олар бор қышқылынан немесе инсектицидті дәріден өледі. Бірақ араларды у жегізуге мәжбүрлеу керек. Ол үшін қоспалар салынған жем дайындаңыз. Жемді былай жасаңыз:
- Ыдысқа сусын (квас, сыра, шарап) құйып, бірнеше қасық тосап немесе қант қосыңыз.
- 1 литр тәтті сұйықтыққа 1 шай қасық бор қышқылын немесе 10 г инсектицидті дәрі қосыңыз. Ингредиенттерді жақсылап араластырыңыз.
- Дайындалған қоспаны жайпақ ыдыстарға құйып, жануарлар мен балалардың қолы жетпейтін биіктеу жерге қойыңыз.
Мұндай сусынды ішкен жәндіктер біраз уақыттан кейін өледі. Аралар толығымен жойылғанша аптасына 1-2 рет сұйықтықты қажетінше тамызып тұрыңыз.
Пластикалық бөтелкеден жасалған тұзақ
Ұяға қолыңыз жетпесе, аралардан қалай құтылуға болады? Жәндіктерді ұстау үшін тәтті сұйықтық құйылған пластикалық бөтелкені (1,5-2 литр) пайдаланыңыз. Good Housekeeping үй шаруашылығына арналған медиа бренді араларды ұстауға арналған тұзақ жасауды ұсынады:
- Қақпағы жабылған бөтелкенің жоғарғы жағының 1/3 бөлігін кесіңіз.
- Төменгі бөлігіне тәтті сұйықтықты (компот, квас, сыра, джем қосылған су) құйыңыз.
- Үстіңгі жағында тұрған қақпақты ашып, аузын төмен қарай жемге арналған ыдысқа қаратыңыз.
- Жасаған тұзақты аралар ұшатын жерге қойыңыз.
Жәндіктер тәтті хош иістерге үймелейді және олар міндетті түрде бөтелкеге қонады. Осылайша бөтелкенің тар тесігіне ұмтылған аралар қайта шыға алмай, сұйық қоспаға батып кетеді. Келесі күні өлі араларды сумен бірге төгіп, бөтелкеге жаңа сұйықтық құйыңыз.
![Тосаптағы аралар Тосаптағы аралар](https://cdn.nur.kz/images/1120/525f64e276373fd2.jpeg)
Арадан қорғайтын бүріккіштер
Үйдегі араларды қалай кетіруге болады? Аралар сірке суының, бензиннің, керосиннің, еріткіштердің және эфир майларының өткір иісін ұнатпайды. Мұндай қоспаларды шашырату қауіпті жәндіктерді үйден, бөлмеден және балконнан шығаруға көмектеседі. Бұлай істеу үшін ұтымды әрекет етуіңіз керек:
- Шүберекті сірке суына, бензинге, керосинге немесе еріткішке батырыңыз.
- Терезе жақтаулары мен үйдегі бұрыштарды, қоршаулар мен балкон қоршауларын, шатыр астындағы қуыстарды сүртіп шығыңыз.
- Аралар жойылғанша бұл әдісті күн сайын қайталаңыз.
Ащы иісі бар сұйықтықты бүріккіш бөтелкеге құйып, аралар ұшатын жерлерге шашуға болады. Жанатын қоспалармен жұмыс істегенде қауіпсіздік ережелерін сақтаңыз.
WikiHow жобасы үй жағдайында судың ¾ бөлігі және ыдыс сабынының ¼ бөлігі қосылған инсектицид жасауға кеңес береді. Ерітіндіні бүріккіш бөтелкеге құйып, жәндіктер үймелеген ұяға немесе олар жиналған жерге шашыратыңыз. Аралар құрсағында орналасқан демтесік арқылы тыныс алады, сондықтан жабысқақ сабын ерітіндісі олардың дем алуына кедергі жасайды, сөйтіп жәндіктер өледі.
Араларды алдауға арналған жасанды ұя
Аралар бос жерлерде колониялар жасайды және аумақтық принципті қатаң ұстанады. Оларды жасанды ұямен алдап көріңіз, бұл оларға жаңа колонияның елесін жасайды. Жасанды ұяны осылай жасап көріңіз:
- Полиэтилен пакеттің ішіне ұсақталған қағазды тығыздап толтырыңыз.
- Қағаз қапты мыжып, қағаз салынған полиэтилен пакетіне салыңыз.
- Үстіңгі жағына тесік жасап, оның ішінен жіптің бір бөлігін өткізіңіз.
- Жәндіктер көруі үшін олардың ұясының жанына уақытша ұя іліп қойыңыз.
Аралар жаңа заттың пайда болғанын бірден біле бермейді. Бұл бірнеше сағат немесе күнге созылуы мүмкін. Жасанды ұяны байқаған аралар алдымен нысанды зерттейді. Егер олар бәсекелестер пайда болды деп күдіктенсе, өз ұясын тастап кетеді.
![Алаулаған от Алаулаған от](https://cdn.nur.kz/images/1120/190e1737d03fcc60.jpeg)
Жердегі араларды ыстау
Саяжайларда құм арасындағы індерде тұратын аралар жиі кездеседі. Олардың шағуы қауіпті, сондықтан көктемде жәндіктерді жою үшін кешенді шараларды жүргізу қажет. Аралардың ұясын табу үшін ұшып бара жатқан кезін бақылаңыз және от түтетіп ыстаңыз. Ол үшін мына әрекеттерді жасаңыз:
- Жердегі індердің кіреберісін жұқа тормен жабыңыз.
- Жер асты ұясының жанына от жағыңыз. Ащы түтін жерге енуі үшін тек отын ғана емес, сонымен қатар резеңке мен пластмасса бөліктерін де тастаңыз. Апанға жанғыш қоспа құйып, өртеуге болады.
- Аралардың ұядан ұшып-ұшпағанын бір-екі күн бақылаңыз.
Түтін түтетіп, от жаққаннан кейін аралар тұрған жерді қазып алыңыз. Бұл олардан түбегейлі құтылуға көмектеседі. Ара ұясының жанында құрылыс нысаны болса, онда от жағу қауіпті. Оның орнына ара ұясына қайнаған су құйыңыз немесе монтаждау көбігін төгіңіз.
Табиғатта аралар зиянкес жәндіктерді жояды. Бірақ олардың шағуы адамдар мен жылы қанды жануарлар үшін өте қауіпті. Араларды жоюдың маңызды міндетке айналатыны содан болса керек. Біз ұсынған әдістердің бірі олармен күресуге көмектеседі.
Мақаланың түпнұсқасы: https://kaz.nur.kz/lady/2110251-zhabaiy-aralardan-qalai-qutyluga-bolady-uige-kirgen-zhandikterden-aryludyng-tiimdi-adisteri/