Етсіз котлет рецебі: Нұрзина Серікбаева ұсынған дәмді тағамды пісіріп көріңіз

Үйіңізде ет таусылған жағдайда котлетті қалай даярлауға болады? Қарапайым қарақұмық пен картоптан дайындалатын әрі дәмі етпен жасалатын котлеттен кем түспейтін дәмді және тойымды котлеттің рецебімен бүгінгі материалда таныс болыңыздар.

Қарақұмық пен картоптан жасалатын дәмді котлеттің рецебімен Нұрзина Серікбаеваның YouTube арнасынан таныс болыңыздар.

Сипаттамасы

Асхана: Еуропа

Санаты: басты тағам

Дайындалу уақыты: 5 минут

Дайын болу уақыты: 30 минут

Құрамы

Қарақұмық - 200 г

Картоп- 400 г

Жұмыртқа - 1 дана

Тұз, бұрыш, дәмдеуіштер - дәміне қарай

Ұн - 3 ас қасық

Ұсақталған кепкен нан - қалауыңызға қарай

Пияз - 1 дана

Сәбіз - 1 дана

Томат - 1ас қасық

Су - 1 стақан

Дайындалуы

1. Картоп пен қарақұмықты пісіреміз

Алдымен картоп пен қарақұмықты қайнаған суға салып, пісіріп аламыз. Сосын суын төгіп тастап, екеуін бір ыдысқа саламыз. Үстінен жұмыртқа, тұз, бұрыш пен дәмдеуіштерді қосып, барлығын блендермен ұсақтап, езіп аламыз.

2. Бөлек ыдысқа кептірілген ұсақ нан мен ұнды дайындаймыз

Бөлек ыдысқа үш ас қасық ұнды саламыз. Үстінен кептірілген ұсақ нанды қосып, араластырамыз. Осы қоспаға котлеттерді аунатып, пісіретін боламыз.

3. Котлеттерге пішін береміз

Котлеттерге сопақша пішін беріп, ұн мен ұсақталған кепкен нанның қоспасына аунатып, дайындап аламыз. Табаға май құйып, отқа қыздырып қоямыз.

4. Котлеттерді пісіреміз

Баяу отта қыздырылған майға котлеттерді салып, екі жақ беті қызарғанша қуырып, пісіріп аламыз.

5. Гарнирді дайындаймыз

Гарнирге күріш, картоп пюресі немесе макарон және т.б. пісіре аласыз. Біздің жағдайда таза суға макаронды пісіріп аламыз.

6. Cоус дайындаймыз

Бір пиязды аршып, турап, табадағы қызып тұрған майға қуырамыз. Үстінен сәбіз саламыз. Дәміне қарай тұз, томат қосамыз. Бір бокал су құйып, баяу отта қайнатамыз. Осылайша соус дайын болады. Гарнирди тәрелкеге салып, үстінен алдымен соус қосамыз. Сосын үстіне котлеттерді қойып, дастарханға ұсынсаңыздар болады.