Картоп пюресі қосылған ерекше котлет: Ариана Дәуренқызынан дәмді кешкі ас рецебі

Котлет көптеген отбасының кешкі және түскі асқа сүйіп жейтін тағамы. Дәмді әрі тойымды болатын негізгі тағамды туралған еттен қалай әзірлеуге болады? Бүгінгі рецепттен білетін боласыздар.

Үй жағдайында дәмді котлет даярлаудың түрлі тәсілі бар. Бүгін сіздерге туралған еттен жасалатын котлеттің рецебімен белгілі фудблогер Ариана Дәуренқызы таныстыратын болады.

Сипаттамасы

Асхана: Еуропа

Санаты: басты тағам

Дайындалу уақыты: 15 минут

Дайын болу уақыты: 20 минут

Құрамы

Картоп - 1 кг

Cу - мөлшеріне қарай

Тартылған ет - 800 г

Пияз - 2 дана

Тұз, қара бұрыш, дәмдеуіштер - дәміне қарай

Ұсақталған кепкен нан - 50 г

Жұмыртқа - 1 дана

Cүт - 50 мл

Томат пастасы - 2 шай қасық

Қатты ірімшік - 150 г

Дайындалуы

1. Картопты пісіреміз

Алдымен картопты қабығынан аршып, жақсылап жуып аламыз. Сосын ірілеу етіп тураймыз. Туралған картопты кастрюльге салып, үстіне су қоямыз. Суды қайнатып, картопты пісіреміз.

2. Котлетке қажет тартылған етті дайындаймыз

Тартылған етті шұңғыл ыдысқа саламыз. Екі пиязды ет тартқыштен өткізіп, етке қосамыз. Дәміне қарай тұз, қара бұрыш пен дәмдеуіштерді қосамыз. Сонымен бірге ұсақталған кепкен нан мен бір жұмыртқаны қосып, барлығын жақсылап араластырамыз.

3. Котлеттерді жасаймыз

Алдымен противеньге сұйық май жағамыз. Сосын қолымызға сұйық май жағып, котлеттерді жасаймыз. Барлық котлетті противеньге қоямыз. Котлеттерді алдын ала қызған пешке қойып, пісіріп аламыз.

4. Піскен картоптан пюре жасаймыз

Піскен картопқа 50 мл сүт құйып, дәміне қарай тұз сеуіп, картоп пюресін дайындаймыз.

5. Пюреден котлет жасаймыз

Дайын болған пюреден котлет жасаймыз. Сосын оны ет котлеттерінің үстіне қоямыз. Бөлек ыдысқа аздаған су құйып, оған екі шай қасық томат пастасын қосамыз. Екеуін араластырып, противеньдерге котлеттерге құямыз.

6. Котлеттің бетіне қатты ірімшік сеуіп, пісіреміз

Ірімшіктті үккіштен өткіземіз. Сосын котлеттердің бетіне себеміз. Противеньді 180 градустағы пешке, тағы да 20 минутқа салып, пісіреміз. Картоп пюресі қосылған мұндай ерекше котлетті кез келген гарнирмен бірге дастарханға ұсына аласыз.