Қазақстанда ұялы байланыс операторы абоненттердің келісімінсіз тарифті көтерсе не істеу керек

Қазақстандықтар ұялы байланыс операторының қызмет бағасы күрт өсу мәселесіне жиі кезігеді. Тұтынушылардың құқықтарын қорғау комитетінде абоненттердің келісімінсіз баға көтерілген жағдайда не істеу керектігі айтылды.

Қазақстан мобильді интернеті арзан ел болып табылады. Алайда тарифтер, шексіз қоңыраулар және SMS хабарламалар көбіне арзан бола бермейді. Оның үстіне ұялы байланыс операторлары өз қызметтерінің құнын үнемі арттырып отырады және кейде қандай да бір тарифтің бағасын өз абоненттеріне хабарламай жоғарылатады.

Ақмола облысының Сауда және интеграция министрлігінің Тұтынушылардың құқықтарын қорғау комитетінің түсіндіруінше, мұндай әрекеттер заңсыз болып саналады.

Ведомствоның хабарлауынша, осы мәселеге байланысты ұялы байланыс операторы қазақстандықтың тарифі мен ұсынылатын қызметтер пакетін оның келісімінсіз өзгерткен. Нәтижесінде абоненттік төлем 2590 теңгеден 3290 теңгеге дейін өскен.

Клиент компанияға шағым түсірген, алайда ұялы байланыс операторының жауабын күтпестен, комитеттің көмегіне жүгінуге мәжбүр болды.

Комитет ұялы байланыс операторын тексеру нәтижесінде оның "Тұтынушылардың құқықтарын қорғау туралы" заңды бұзғанын анықтаған. Біріншіден, тарифті біржақты өзгерткен, екіншіден, байланыс операторы пайдаланушының өтінішін елемей, 10 күнтізбелік күн ішінде келіп түскен талапқа жауап бермеген.

Сондай-ақ ұялы байланыс операторының кеңсесін тексеру барысында тұтынушылар үшін ақпараттың жетіспеушілігі анықталған.

Аталған фактілерге байланысты Ақмола облысы бойынша Сауда және интеграция министрлігінің Тұтынушылардың құқықтарын қорғау комитетінің тарапынан ұялы байланыс операторы барлық анықталған құқық бұзушылықты заңнамада белгіленген мерзімде жоюға, сондай-ақ 1 725 000 теңге көлемінде айыппұл төлеуге міндеттелді.

Заң бұзушы компания өз кезегінде бұл шешімге сотқа шағым түсірмек болған, алайда оның шағымы қанағаттандырусыз қалдырылып, комитеттің шешімі өзгеріссіз қалды. Осылайша Ақмола облысынан келген тұтынушының құқығы қорғалған.

Айта кетсек, ұялы байланыс операторымен тікелей шеше алмаған барлық мәселені тұтынушылар осы жол арқылы шеше алады. Аумақтық комитеттердің байланыс нөмірін Тұтынушылардың құқығын қорғау комитетінің ресми сайтында табуға болады.

Еске сала кетейік, Қазақстанда ұялы байланыс операторы сапасыз интернет немесе ұялы байланыс ұсынған жағдайда оған айыппұл салынады.