Қазақстандық экономистер доллар бағамы 400 теңгеге дейін құлдырайды деп болжады

Тәуелсіз сарапшылар биыл теңге нығаяды деп болжап отыр - сарапшылардың пікірінше, жыл соңына дейін доллар 400 теңгеге дейін арзандауы мүмкін, деп хабарлайды КТК телеарнасының сайты.

Кеше Бірінші кредиттік бюро бір жыл ішінде Қазақстанда доллар түріндегі депозиттер бойынша түсімдер 18 пайызға қысқарғанын хабарлады: 2023 жылдың соңында қазақстандықтар шетел валютасындағы депозиттер бойынша 8 триллион теңгеден сәл асатын ақша ұстаған. Бұл 2022 жылмен салыстырғанда шамамен 2 триллионға аз.

Ал депозиттер санының өзі 26 пайызға өскен. Қазақстандықтардың түрлі валютадағы депозиттерінде жалпы 34 триллион теңгеден астам қаражат сақталған. Бұл бір жыл бұрынғыдан 12 пайызға артық.

Сарапшылар долларланудың бірден 18 пайызға төмендеуіне мөлшерлеменің төмендігі себеп болғанын алға тартады.

Кейінгі уақытта теңге тұрақтылық танытып отыр. Сарапшылар бұған Қазақстанда ғана емес, бүкіл әлемде инфляцияның бәсеңдеуі әсер етіп отыр деп есептейді.

Оның үстіне экономистер биыл доллардың теңгеге шаққандағы бағамы 400 теңгеге дейін арзандауы мүмкін деп болжап отыр. Бұл жағдай АҚШ Федерал резерв жүйесі мөлшерлемелерді төмендеткен жағдайда болуы мүмкін.

"Менің 2024 жылдың соңына дейінгі болжамым: теңге-доллар – 400 теңге. Мен мұны бізде барлық жағынан тұрақтылық бар екеніне сүйеніп айтып отырмын. 450-ден 400 теңгеге дейін қозғалуына не әсер етеді? Өйткені доллар әлем бойынша құлдырап барады. Неліктен құлдырады? Өйткені ол бұған дейін екі жыл өсті. Ал кейінгі алты айда құлдырай бастады. Неліктен? Өйткені барлығы АҚШ Федерал резерв жүйесі мөлшерлемелерді төмендете бастайды деп болжап отыр", - дейді тәуелсіз талдаушы Нұрғали Нұрмахамбетов.

Елдегі экономикалық жағдайда көп нәрсе базалық мөлшерлемеге байланысты. Ол жағдайларды болжауға қарай артуы не төмендеуі мүмкін. Ал егер базалық мөлшерлеме жоғарыласа, әдетте онымен бірге баға да көтеріледі және несиенің барлық түрлері қымбаттайды. Дегенмен теңгедегі депозиттер бойынша мөлшерлеме де көтеріледі. Бірақ көптеген сарапшының пікірінше, 2024 жылы қаржы реттеушісі базалық мөлшерлемені жоспарлы түрде төмендетеді.

Дереккөз: КТК