Жер сілкінісі жағдайына арналған дабыл шабаданын жинауға қанша қаражат кетеді

Алматы тұрғындары сезінген жер сілкінісі мұндай апатты оқиғаларға алдын ала дайын болу маңызды екенін көрсетті. KAZ.NUR.KZ табиғи апат кезінде дабыл шабаданын жинауға қанша қаржы жұмсалатынын есептеп көрді.

Дабыл шабаданы – адамға су мен тамақсыз бірнеше күн бойы аман қалуға көмектесетін қажетті заттардың жиынтығы. Бұл құтқарушыларға зардап шеккендерді тауып, қауіпті аймақтан эвакуациялауға көмектеседі.

Мұндай жиынтықтардың жер сілкінісі, су тасқыны, цунами және т.б. табиғи апаттар болатын аймақтарда қолжетімді, оңай жерде тұрғаны дұрыс.

Бір адамға арналған жедел жәрдем жинағының құны

Әдетте апаттық шабаданның стандартты жиынтығы әртүрлі қол жетімді құрал-сайман, киім-кешек, су мен тамақ, құжаттар мен дәрі-дәрмекті қамтуы керек.

Онлайн-маркетплейстердегі орташа бағадағы шұғыл жинаққа арналған заттардың толық тізімі мынандай:

• ақша және құжаттардың көшірмесі – ақша сомасы адамның жеке қалауына байланысты;
• алғашқы медициналық көмек қобдишасы – жинақтың құны 1 000-15 000 теңге аралығында (медициналық құралдардың жинақы әрі жеткілікті жиынтығын алу маңызды);
• су (бөтелкедегі) – күніне 3-4 литр мөлшерінде, бұл шамамен 1 000 теңге болады (жазда 5-6 литр қажет – 1 500 теңгеге дейін);
• азық-түлік – сақтау мерзімі мейлінше ұзақтау болатын консервілер мен жоғары калориялы 3 500-ден 6 000 теңгеге дейінгі әскери азық-түлік рационы (құрғақ азық);
• жеке гигиена құралдары – дымқыл (1 500 теңгеден басталады) және құрғақ (200 теңгеден басталады) майлық жиынтығы;
• жылы киім – шұлық, шалбар және жылы сыртқы киім (мысалы, күрте), оны үйдегі заттардан жинауға болады;
• көрпеше – ең арзаны шамамен 2 000 теңгеден басталады;
• радиоқабылдағыш пен қолшам (екеуі де аккумулятормен) – радиожиілік станциясы 3 000 теңгеден, ал ықшам және бір мезгілде жарқырайтын қолшам орта есеппен 1 000 теңге тұрады;
• сіріңке мен ысқырық – 500 теңгеден басталатын сомаға сатып алуға болады.

Осылайша, мұндай жиынтыққа шамамен 14 000 теңгеден астам ақша жұмсауға тура келеді. Мұның бәрі жолдорбаға немесе сөмкеге сыятындай болуы керек, оның құны да өлшеміне, материалына және т.б. байланысты. Бірақ өзіңізде барын да пайдалана аласыз.

Қазақстанда дабыл шабаданын салыстырмалы түрде аз ақшаға жинауға болады. Бірақ жинақтың кейбір элементтерін үнемі жаңартып отыру қажет екенін есте ұстаған жөн (тамақ, дәрі-дәрмек, батарейка).