Қазақстанда МӘМС жарналарын төлеу ережесіне түзетулер енгізілді

Қазақстанда МӘМС жарналарын төлеу ережесіне енгізілген өзгерістер күшіне енді. Олардың арқасында ұзақ еңбек демалысына шығатын қызметкерлер енді жүйедегі мәртебесін жоғалтпайды. Толығырақ KAZ.NUR.KZ материалынан оқыңыздар.

Бұған дейін қазақстандықтар ұзақ мерзімді демалысқа шыққаннан кейін міндетті әлеуметтік медициналық сақтандыру жүйесінде (МӘМС) мәртебесін жоғалтуға тап болып жататын.

Әдетте мұндай проблема мұғалімдерге, тау-кен кәсіпорындарының жұмыскерлеріне, сондай-ақ вахталық әдіспен жұмыс істейтіндерге қатысты еді. Өйткені олардың демалысы көбінесе бір айдан астам уақытқа созылуы мүмкін.

Естеріңізге сала кетейік, жақында 222 мыңға жуық қазақстандық МӘМС мәртебесінен айырылды. Олар ұзақ мерзімді еңбек демалысында болған, ал жарналар мен аударымдар еңбек демалысы төленген айда бір төлеммен жүргізілген.

Осылайша, "бос ай" пайда болып, жұмыскерлер жүйеде "сақтандырылған" мәртебесін жоғалтты, бұл оларға МӘМС бойынша қызметтерді пайдалану құқығын бермейді.

Айта кету керек, бұрын мұндай проблема болған жоқ, өйткені МӘМС жүйесі екі ай төлем жасалмаса да, азаматтарды мәртебесінен айырмаған. Алайда 2023 жылдың қазан айынан бастап бұл өзгерді.

Дегенмен мұндай мәселеге тап болған қазақстандықтарға МӘМС-тегі мәртебе қайтарылды. Алайда, мұндай жағдайлардың қайталанбауы үшін Әлеуметтік медициналық сақтандыру қоры міндетті медициналық сақтандыру бойынша жарналар мен аударымдарды аудару ережелеріне бірқатар өзгерістер енгізуге бастамашы болды және олар қазір заңды күшіне енді.

Қазақстандықтың демалысқа байланысты жүйеде мәртебесін жоғалтпауы үшін, бір немесе одан да көп айға демалыстарды есептеу кезінде жұмыс беруші аударымдар мен жарналарды демалыс күндерінің санына пропорционалды есептелген кезеңдер бойынша бөле отырып, бір төлеммен жүргізуге міндетті.

Мысалы, егер мұғалім 25 маусымда демалысқа шығып, 18 тамызда оралса, онда оған демалыс төлемдерін төлеу кезінде МӘМС жүйесіне төлемді бір төлем тапсырмасымен, бірақ үш жол бойынша бөліп төлеу қажет: маусым, шілде, тамыз. Әр ай үшін сома тиісті демалыс күндеріне сәйкес есептеледі: маусымда 7 күн, шілдеде 31 күн және тамызда 18 күн.

Осылайша, мұғалім МӘМС жүйесіндегі мәртебесін жоғалтпайды.

Сондай-ақ қазақстандық жұмыс берушілер кейбір қызметкерлердің жалақысынан МӘМС жарнасын ұстамауы керек екенін еске саламыз.