Қазақстанда жаңа зейнетақы төлемдерін тағайындау қағидалары әзірленді

Қазақстанда жаңа зейнетақы жарналары бойынша төлемақы тағайындау ережелері әзірленді. Оларды зейнеткерлер мен мүгедектер өмір бойы алады. Заң жобасымен KAZ.NUR.KZ тілшілері танысты.

Қазақстанда жұмыс берушінің жаңа міндетті зейнетақы жарнасы (ЖМЗЖ) кезең-кезеңімен енгізілуде. Соның есебінен салымшылардың шартты зейнетақы шоттары қалыптасады, оларды мұраға қалдыруға, елден көшкен кезде алып кетуге, тұрғын үй алуға жұмсауға және т.б. болмайды.

Сондай-ақ жұмыс берушілер ЖМЗЖ төлемін тек 1975 жылдың 1 қаңтарынан кейін туған қызметкерлерге төлейді. Яғни болашақта жаңа зейнетақы жарналары есебінен төлемақыны тек осы жас санатындағы адамдар алады.

Бұл ретте ҚР Еңбек және халықты әлеуметтік қорғау министрлігі жұмыс берушінің Бірыңғай жинақтаушы зейнетақы қорынан төленетін міндетті зейнетақы жарналары есебінен зейнетақы төлемдерінің мөлшерін айқындау және жүзеге асыру қағидаларын әзірледі.

Оларға сәйкес, ЖМЗЖ жалпы алғанда бес жылдан кем емес мерзімге төленген адамдарға жаңа төлемақы тағайындалады:

• зейнеткерлік жасқа жеткенде;
• бірінші немесе екінші топтағы тұрақты мүгедектік жағдайында.

ЖМЗЖ есебінен БЖЗҚ-дан зейнетақы төлемдері өмір бойы тағайындалады және қайтыс болғанда немесе Қазақстан Республикасынан тыс жерлерге тұрақты тұруға кеткен айы бойынша жүзеге асырылады.

"Ашық НҚА" порталында орналастырылған қаулы жобасында зейнетақы төлемдерінің мөлшерін БЖЗҚ халықтың өлімі туралы деректер негізінде есептелген ағымдағы құн факторын, инфляцияның болжанатын деңгейінің орташа мәнін және кірістіліктің пайыздық мөлшерлемесінің мөлшерін ескере отырып айқындайтыны көрсетілген.

Жаңа зейнетақы төлемдерінің ең жоғары мөлшері тиісті қаржы жылына екі ең төменгі күнкөріс деңгейін құрайды (мысалы, 2024 жылы ол 86 814 теңге). Бірақ кейіннен ол жыл сайын артып отырады.

Сондай-ақ қазақстандықтар бұрынғысынша мемлекеттік зейнетақы мен БЖЗҚ-дағы өз жинақтары бойынша төлемдерді ала алады.