Жаңа зейнетақы жарналары тек теңгемен инвестицияланады: олардан табыс түсе ме

ЖМЗЖ есебінен жинақталған қаражат БЖЗҚ-ның негізгі активтерінен бөлек және тек теңгемен инвестицияланады. Бұл ретте инвестициялық кіріс қазірдің өзінде 366,79 млн теңгеге тең болды. Толығырақ KAZ.NUR.KZ материалынан оқыңыздар.

Соңғы мәліметтер бойынша, қазақстандықтардың зейнетақы жинақтарының жалпы сомасы шамамен 19 триллион теңгеге жетті. Қаражаттың едәуір бөлігі міндетті, міндетті кәсіптік және ерікті зейнетақы жарналары (МЗЖ, МКЗЖ, ЕЗЖ) есебінен қалыптасқан жинақтардан келеді.

Бұл ретте ақша жай жатқан жоқ, оны зейнетақы активтерін басқарушылар – ҚР Ұлттық Банкі және бес жеке компания инвестициялайды.

Дегенмен жаңа жылдан бастап жұмыс берушінің жаңа міндетті зейнетақы жарнасы (ЖМЗЖ) енгізілді. Осы уақыт ішінде қазақстандықтардың шартты шоттарына шамамен 57,9 миллиард теңге аударылды. Бұл ақша да жинақтардың негізгі массасынан бөлек, әртүрлі қаржы құралдарына салынған.

Бірыңғай жинақтаушы зейнетақы қорының (БЖЗҚ) деректеріне сәйкес, 2024 жылғы 1 мамырдағы жағдай бойынша БЖЗҚ-дан алынған барлық сома тек теңгемен инвестицияланған.

Қаражаттың көп бөлігі (98,11 пайыз) ҚР Қаржы министрлігінің мемлекеттік бағалы қағаздарына салынған. Тағы 1,20 пайызы инвестициялық шоттарда және шамамен 0,69 пайызы ҚР Ұлттық Банкінің депозиттерінде жатыр.

1 мамырға қарай ЖМЗЖ бойынша есептелген инвестициялық кіріс мөлшері 366,79 млн теңге болды. Осылайша, жаңа жарна есебінен жинақтардың кірістілігі 1,76 пайызға жетті.

Басқа жинақтардан түсетін табыс қандай?

МЗЖ, МКЗЖ және ЕЗЖ қалыптастырған зейнетақы жинақтарына келетін болсақ, олардың 18,9 триллион теңге көлеміндегі негізгі бөлігін де ҚР Ұлттық Банкі басқарады. Бұл ретте МКЗЖ-дан айырмашылығы, олардың үшінші бөлігі (33,66 пайызы) доллармен, ал қалған бөлігі теңгемен салынған.

Осылайша, төрт айда Ұлттық банк салымшыларға 530,34 млрд теңге пайда түсірді. Жыл басынан бері кірістілік 2,87 пайыз болды.

Жеке компаниялар қанша пайда тапты

БЖЗҚ салымшыларының жинақтары есебінен қалыптастырылған жеке инвестициялық портфельді басқарушылардың (ИПБ) иелігінде 47,3 млрд теңге бар:

• "Jusan Invest" АҚ сенімгерлік басқаруындағы зейнетақы активтері 8,08 млрд теңгеден асты. Компания өз қаражатының 36,77 пайызын доллармен, ал қалған 63,23 пайызын теңгемен салады. Төрт айда ИПБ 156,48 миллион теңге табыс тауып, 2,14 пайыз табыстылығын көрсетті;
• "Halyk Global Markets" АҚ сенімгерлік басқаруындағы зейнетақы активтері 3,8 млрд теңгеден асты. Соманың 69,51 пайызы теңгеде, ал қалған 30,49 пайызы долларда сақталған. Жыл басынан бері компания 59,78 млн теңге табыс тауып, 1,59 пайыз табыстылық көрсетті;
• "BCC Invest" АҚ 4,3 млрд теңгені басқарады. 17,11 пайызы долларда, ал қалған 82,89 пайызы теңгеде сақталған. Төрт айда компания салымшылар үшін 85,48 миллион теңге табыс тапты. Табыстылық 2,03 пайыз болды;
• "Сентрас Секьюритиз" АҚ басқаруында 1,2 млрд теңгеден астам қаражат бар. Компания доллармен 22,41 пайыз, канадалық доллармен – 1,71 пайыз ақша, ал қалған 75,88 пайызын теңгемен ұстайды. Жыл басынан бері 49,27 млн теңге кіріс түскен. Осылайша кірістілік 4,24 пайызға жетті;
• "Қазақстан Халық Банкінің ЕҰ" Halyk Finance" АҚ басқаруында 29,9 млрд теңгеден астам қаражат бар. Компания теңгемен портфельдің 73,33 пайызын, доллармен – 26,49 пайызын – 2, ал еурода 0,18 пайызын сақтайды. Жыл басынан бері ИПБ 410,54 млн теңге табыс тауып, 1,81 пайыз кірістілік көрсетті.

Осылайша, барлық басқарушы компаниялар өз салымшыларына табыс әкеледі. Сондай-ақ олардың нәтижелерін бағалау әлі ерте екенін есте ұстаған жөн. Себебі мұндай инвестициялардың табыстылығы кем дегенде бір жыл ішінде анық болады.

Естеріңізге сала кетейік, кез келген қазақстандық қаласа, жинақ ақшасының 50 пайызын кез келген жеке басқарушы компанияға аудара алады.