Қазақстанда қант экспортына шектеу қойылды: қор жеткілікті ме

Бүгіннен бастап Қазақстанда қант экспортына ресми түрде уақытша шектеу қойылды. Шектеу биыл 31 тамызға дейін жалғасады, деп хабарлайды Ауыл шаруашылығы министрлігіне сілтеме жасаған KAZ.NUR.KZ.

"Қант әкетудің кейбір мәселелері туралы" ауыл шаруашылығы министрінің 2024 жылғы 11 маусымдағы № 196 бұйрығымен 2024 жылғы 31 тамызға дейін ел аумағынан, оның ішінде Еуразиялық экономикалық одаққа мүше мемлекеттерге қант әкетуге уақытша шектеу енгізілді.

Ведомсвто мәліметінше, шектеу Қазақстан аумағы арқылы халықаралық қант транзитіне, сондай-ақ Қазақстан Республикасының аумағы арқылы Еуразиялық экономикалық одаққа мүше бір мемлекеттің аумағынан Еуразиялық экономикалық одаққа мүше басқа мемлекеттің аумағына қант тасымалдауға қатысты қолданылмайды.

Бұйрық 2024 жылғы 14 маусымнан бастап күшіне енді.

Қант шығаруға уақытша шектеу шараларын белгілеу туралы шешім Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияда 2024 жылғы 6 мамырда қабылданды.

Айта кетейік, жазғы кезеңде ішкі нарықта қант тұтынудың халық тарапынан да, индустриялық тұтынушылар тарапынан да өсуі байқалады. Осыған байланысты, қант әкетуге уақытша тыйым салу ішкі нарықты қамтамасыз ету және оның кері экспортын болдырмау мақсатында енгізілді.

Тұтастай алғанда, қазіргі уақытта елдегі қант қоры қант қызылшасының жаңа өнімі басталғанға дейін қантқа деген сұранысты қамтамасыз ету үшін жеткілікті.

Бұдан бөлек, отандық қант зауыттары қант өндіру үшін үшінші елдерден қамыс шикізатын әкелуді жүзеге асырады.

Қазіргі уақытта министрлік өнеркәсіптік қайта өңдеу үшін шикі қантты баж слығынысыз әкелуге өтінімдер қабылдауды жалғастырып жатыр.

Еске салайық, ЕЭК аясында Қазақстан үшін биыл 300 мың тонна көлемінде шикі қант бажсыз әкелуге квота келісілді.