Жасанды интеллект себепші: әлемдегі ең қымбат компания анықталды

Америкалық чип өндірушісі Nvidia акцияларының бағасы рекордты деңгейге көтеріліп, әлемдегі ең қымбат компанияға айналды. Фирманың мұндай жетістігіне жасанды интеллект секторына басымдық беру әсер еткен. Толығырақ KAZ.NUR.KZ материалынан оқыңыздар.

Сейсенбі күнгі сауданың соңында Nvidia акциялары шамамен 136 доллар болды, бұл сегіз жыл бұрынғыдан жүз есе көп.

Енді компанияның құны кеше кешке дейін әлемдегі ең қымбат компаниялардың әлемдік көшін бастаған Microsoft-тан да қымбат. Маусым айының басында Nvidia бұл көрсеткіш бойынша Apple-ді басып озып, оны үшінші орынға түсірді.

Қазіргі уақытта нарық Nvidia-ны 3,34 триллион долларға бағалап отыр, тек осы жылдың ақпан айынан бастап компания құны бір жарым еседен астамға өскен.

Дербес компьютерлерге арналған графикалық карталардан басқа, Nvidia жасанды интеллектіні дамыту және үйретуге қажетті компьютерлік чиптерді жасайды және оның өнімдеріне сұраныс артып, соның арқасында сатылымдар мен пайда да өсуде.

Көптеген инвестор Nvidia-ның кірісі одан да артуы мүмкін деп санайды, дегенмен компанияның нарықтағы бағасы оның шынайы бағасын көрсете ме деп күмәнданатындар да бар.

Дегенмен жасанды интеллект әзірлеушілер арасындағы бәсекелестік өте жоғары және оған технология нарығының алпауыт компаниялары – Microsoft, Alphabet (Google-дың бас компаниясы), Meta, Amazon және Apple қатысады.

1993 жылы Кремний алқабында негізі қаланған Nvidia бастапқыда графикалық өңдеуге арналған компьютерлік ойындардағы микрочиптерді өндіруші ретінде танылды, мұны бүгінде табысты жалғастыруда.

Дегенмен компания басшысы Дженсен Хуанг жасанды интеллектіге басымдық берді: Nvidia графикалық процессорлары бұл технология кеңінен танымал болғанға дейін ЖИ үшін қосымша функцияларға ие болды.