Қазақстанда кейбір көліктерге салынған жоғары салық алып тасталады

Жаңа Салық кодексінен кейбір көліктерге салынған жоғары салық тармағы алынып, ескі көліктерге төмендетілген салық коэффициенттері енгізіледі. Заң жобасымен KAZ.NUR.KZ тілшілері танысты.

Қолданыстағы ҚР Салық кодексінің 492-бабының бірінші тармағына сәйкес жеңіл автомобильдер үшін көлік салығының мөлшерлемесі қозғалтқышының көлеміне қарай 1-ден 117 айлық есептік көрсеткішке (АЕК) дейін өзгеріп отырады. 2024 жылы бұл – 3 692 теңгеден 431 964 теңгеге дейінгі аралықтағы сома.

Мысалы, көлемі 3 литрге дейінгі автокөлік иелеріне салық 9 АЕК-ке дейін, 3-тен 4 литрге дейін - 15 АЕК, 4 және одан да көп литр үшін 117 АЕК болады.

Бұл ретте, баптың екінші пунктінде 2013 жылғы 31 желтоқсаннан кейін Қазақстанда шығарылған немесе осы күннен кейін елге әкелінген қозғалтқышының көлемі 3 литрден асатын жеңіл автомобильдер үшін жекелеген тарифтер көрсетілген. Олар жоғарырақ және қозғалтқыш көлеміне байланысты 35-тен 200 АЕК-ке дейінгі аралықта болады.

Дегенмен бұл норма көп ұзамай жойылуы мүмкін. Ұлттық экономика министрлігі қазіргі уақытта "Ашық НҚА" порталында талқылауға қолжетімді Қазақстан Республикасының жаңа Салық кодексінің жобасын дайындады.

Мұнда көлік құралдарына салықты есептеуге арналған салық мөлшерлемелері бар бап толығымен сақталған. Алайда жоғары мөлшерлемедегі екінші пункт жоқ.

Бұл 2013 жылдың 31 желтоқсанынан кейін Қазақстанда шығарылған немесе осы күннен кейін елге әкелінген қозғалтқышының көлемі 3 литрден асатын жеңіл автокөліктердің иелері бірінші тармақта көрсетілген стандартты мөлшерлемелер бойынша салық төлейтінін білдіреді. Яғни жаңа заң енгізілгеннен кейін ол 117 АЕК-тен аспайды.

Сондай-ақ бапқа автомобильдің жылына байланысты түзету факторлары бар жаңа пункт қосылды:

• пайдалану мерзімі 10 жылдан 20 жылға дейін қоса алғанда – 0,7;
• пайдалану мерзімі 20 жылдан астам – 0,5.

Бұл ескі көлік иелеріне көлік салығы бойынша 30 пайыз және 50 пайыз жеңілдік болады деген сөз.

Осылайша, Қазақстанда жаңа Салық кодексінің енгізілуімен қозғалтқышы үлкен жеңіл автокөлік иелері бұдан былай жоғарылатылған салық төлемейді, ал егер көлік ескі болса, онда төмендету коэффициенті қолданылады.

Қазіргі уақытта заң жобасы ағымдағы жылдың 15 шілдесіне дейін жалғасатын талқылау сатысында. Ал жаңа Салық кодексі 2025 жылы енгізіледі деп жоспарланып отыр