Туыстарына күніне бірнеше рет ақша аударатын қазақстандықтар да тексеріле ме

Мемлекеттік кірістер комитеті жеке тұлғалардың кірістерін әкімшілендіру департаментінің басшысы Дина Құсайынова қазақстандықтардың қандай аударымдарын салық органдары тексеретінін айтты, деп хабарлайды KAZ.NUR.KZ.

Құсайынова атап өткендей, мобильді аударымдарды бақылау заңсыз кәсіпкерлікпен айналысатындарды анықтауды көздейді.

"Бұл бақылау бизнеспен айналыспайтын адамдарға әсер етпейді. Себебі онда үш ай қатарынан 100-ден астам түрлі тұлғадан ақша аударымдары түскен адамдар бақылауға алынады. Яғни маған туыстарымнан ақша түссе, ол маған күніне үш-төрт аударым жасай алады, бұл бір ғана жеке тұлға ретінде есептеледі", - деп түсіндірді спикер.

Қорытындылай келе, ол кәсіпкерлікпен айналыспайтын адамдар бұл бақылауға алынбайтынын тағы да атап өтті.

Қазақстандағы мобильді аударымдар

2024 жылдың 1 қаңтарынан бастап Қазақстанда мобильді ақша аударымдары тексеріле бастады. Дегенмен қарапайым азаматтардың алаңдамауына болатыны атап өтілді. Мұндай тексерулер тек аударымдарды кәсіпкерлік қызметінен кірістерін жасыру үшін пайдаланатындарға қатысты делінді.

Осы орайда кейбір жосықсыз сатушылар тауар немесе қызмет ақысын қолма-қол ақшамен төлеуді талап етіп, онсыз төлемдерді қабылдаудан бас тарта бастады. Мемлекеттік кірістер комитетінің хабарлауынша, мұндай әрекеттер заңсыз.

Сондай-ақ қаңтар айының басында Қаржы вице-министрі Ержан Біржанов туыстарға ұялы байланыс арқылы бір-біріне жіберуге болатын сомаға шектеу қойылмайтынын түсіндірді.