Қазақстандықтар жұбайының келісімінсіз несие ала алмайды: қаулы қабылданды

1 қыркүйектен бастап Қазақстанда заңды некеде тұрған азаматтарға ақшалай несие берудің жаңа ережелері күшіне енеді. Бұл туралы KAZ.NUR.KZ Қаржы министрлігіне сілтеме жасап хабарлайды.

Қазақстанда банктік қарыз немесе микрокредит беруге жұбайының келісімін алу қағидалары бекітілді. Қаржы нарығын реттеу және дамыту агенттігі "Жеке тұлғаға банктік қарыз немесе микрокредит беруге жұбайының келісімін алу қағидаларын, жеке тұлғаға банктік қарыз немесе микрокредит алуға жұбайының келісімі қажет болатын банктік қарыздың немесе микрокредиттің ең төменгі мөлшерін бекіту туралы" қаулыны қабылдады.

Құжат 2024 жылғы 19 маусымда мемлекет басшысы қол қойған "Қазақстан Республикасының кейбір заңнамалық актілеріне кредит беру кезінде тәуекелдерді барынша азайту, қарыз алушылардың құқықтарын қорғау, қаржы нарығын реттеуді және атқарушылық іс жүргізуді жетілдіру мәселелері бойынша өзгерістер мен толықтырулар енгізу туралы" заңды іске асыру үшін қабылданды.

"Қаулымен жұбайының (зайыбының) келісімі қажет болатын банктік қарыздың немесе микрокредиттің ең төменгі мөлшері 1000 АЕК мөлшерінде (2024 жылы 3 692 000 теңге) бекітілді.

Банктік қарыз немесе микрокредит шартына қол қоймас бұрын банк немесе МҚҰ клиенттің тіркелген некесінің (ерлі-зайыптылығының) болуы туралы ақпаратты Әділет министрлігінің ақпараттық жүйесі арқылы тексереді. Ақпарат расталған жағдайда және егер кредит сомасы белгіленген шектен асып кетсе, кредитор жұбайының (зайыбының) банктік қарыз немесе микрокредит беруге келісімін алуға міндетті.

Келісім еркін жазбаша нысанда банктің бөлімшелерінде немесе МҚҰ филиалында қағаз тасымалдағышта не электрондық нысанда ресімделеді. Егер қарыз алушының жұбайы (зайыбы) кредитордың клиенті болып табылған жағдайда, келісімді кредитордың мобильдік қосымшасы арқылы, өзге жағдайларда – клиенттің жұбайы (зайыбы) биометриялық идентификаттаудан өткен болса, "электрондық үкіметтің" веб-порталы арқылы ресімдеуге болады", - делінген хабарламада.

Түзету болашақта отбасының жалпы бюджетіне теріс әсер етуі мүмкін, ерлі-зайыптылардың біреуінің келісілмеген кредит алуын болдырмауға бағытталған.

Сондай-ақ заңда қарыз алушының жұбайының келісімінсіз берілген қарызды кредит берушінің есептен шығару міндеті көзделеді.

Түзетулер биыл 1 қыркүйектен бастап қолданысқа енгізіледі.