Жаңа Салық кодексін қабылдау кейінге қалды: азаматтар декларация тапсыруы керек пе

Жаңа Салық кодексін қабылдау мерзімі кейінге қалдырылғаннан кейін желіде декларация өткізу мерзімі де кейінге шегерілуі мүмкін деген пікірлер пайда болды. Бірақ оған аталған өзгерістер әсер етпейді, деп хабарлайды KAZ.NUR.KZ.

Мемлекет басшысы Қасым-Жомарт Тоқаев Қазақстан халқына жолдауында жаңа Салық кодексінің жобасын қабылдауды келесі жылға қалдыру қажет екенін айтқан еді.

Тоқаевтың сөзінше, мұндай шешімді қабылдауда асығыстыққа жол берілмеу қажет. Президент сондай-ақ үкімет пен парламентте жан-жақты пікірталас өткізуді тапсырды. Президент кодекстің ішінде бизнесті шынымен ынталандыратын салық жеңілдіктерінің тиімділігін арттыру қажет екенін атап өтті.

Бұл декларация тапсыру мерзімі кейінге шегеріледі дегенді білдіре ме

Естеріңізге сала кетейік, Қазақстанда жалпыға бірдей декларациялау 2021 жылы басталды – ҚР Салық кодексінің 71-тарауы "Жалпыға бірдей декларациялау" деген атпен қолданысқа енгізілді. Бұл бағдарлама бірнеше кезеңнен тұрады.

Бағдарламаға енген жылы әрбір жаңа қатысушы 250.00 нысанын тапсырады, содан кейін жыл сайынғы негізде 270.00 нысанын тапсырады.

2024 жылы 15 қыркүйекке дейін жеке кәсіпкерлер, заңды тұлғалардың құрылтайшылары мен басшылары, сондай-ақ олардың жұбайлары кіріс декларацияларын тапсыруы керек. Ал еліміздің барлық тұрғыны 2025 жылы – соңғы төртінші кезеңде қамтылады.

Яғни, жалпыға бірдей декларациялау бағдарламасы бұрын басталған және ҚР Салық кодексінде бекітілген. Сондықтан жаңа кодекстің жобасын қабылдау мерзімдерін кейінге қалдыру салық декларацияларын тапсыру мерзімдеріне әсер етпейді.

Осылайша, 15 қыркүйекке дейін бағдарламаның жаңа қатысушылары 250.00 нысанын, ал бағдарламаға кіргендер 270.00 нысанын тапсыруы керек.