2025 жылы қандай әлеуметтік төлемдер мөлшері көбейеді

Қазақстанда 2025 жылдан бастап мүгедектікке немесе асыраушысынан айырылуға байланысты төленетін әлеуметтік төлемдер сомасы ұлғаяды. Оның қаншалықты өсетіні жайлы толығырақ KAZ.NUR.KZ сайтында.

Екі әлеуметтік төлемнің мөлшері 2025 жылы ұлғайтылатыны белгілі болды. Премьер-министрдің қаулысы жарияланды, оған сәйкес 2025 жылдың 1 қаңтарынан бастап мүгедектік және асыраушысынан айырылу жағдайлары бойынша төлемдер 6,5 пайызға өседі.

Әлеуметтік төлемдердің нақты сомасы әр адамға жеке есептеледі. Яғни, қазіргі таңда алатын төлеміңіз 6,5 пайызға өседі.

Қазақстан Республикасы Еңбек және халықты әлеуметтік қорғау министрлігінің қазан айындағы мәліметі бойынша:

• мүгедектікке байланысты төлемдердің орташа мөлшері – 59 256 теңге;
• асыраушысынан айырылғандарға төленетін төлемдердің орташа мөлшері – 63 743 теңге.

Мемлекеттік әлеуметтік сақтандыру қорынан төленетін бес түрлі төлемнің тек осы екеуі 2025 жылы индексацияланады. Қалған төлемдердің мөлшерінде өзгеріс болмайды.

Бұл төлемдер Мемлекеттік әлеуметтік сақтандыру қорынан (МӘСҚ) төленеді және ресми түрде жұмыс істеп, барлық міндетті аударымдары уақытында жүргізілген азаматтарға қолжетімді.