"Бұл жасқа жету екінің бірінің маңдайына жазылмайды": Тоқаев жүз жасаған соғыс ардагерінің үйіне барды (фото)
Жарияланған күні:
![Президент соғыс ардагері Иван Гапичтің үйінде Президент соғыс ардагері Иван Гапичтің үйінде](https://cdn.nur.kz/images/1120x630/b0e33830aea0abe4.jpeg)
Мемлекет басшысы БҚО-ға жұмыс сапары барысында жүз жасаған соғыс ардагері Иван Гапичпен және 96 жастағы өлкетанушы Жайсаң Ақбаймен кездесіп, әңгімелесті, деп хабарлайды Ақорда ресми сайтында.
Қасым-Жомарт Тоқаев соғыс ардагері Иван Гапичтің үйіне барып, 100 жасқа толған мерейтойымен құттықтаған.
Президент оның өмір жолы халыққа қызмет етудің, ерен еңбектің, отансүйгіштіктің жарқын үлгісі саналатынын атап өткен.
"Бұл жасқа жету екінің бірінің маңдайына жазылмайды. Оның үстіне сіз Ұлы Отан соғысына қатыстыңыз. Біз майдан даласында болған соғыс ардагерлеріне зор құрметпен қараймыз. Соғыстан кейінгі жылдары елге оралып, прокуратура органдарында еңбек етіп, еліміздің дамуына сүбелі үлес қостыңыз. Сізге алғыс айтамын", – дейді мемлекет басшысы.
![Президент соғыс ардагері Иван Гапичтің үйінде Президент соғыс ардагері Иван Гапичтің үйінде](https://cdn.nur.kz/images/1120/89d8a7732a18af48.jpeg)
Иван Гапич 1923 жылы Ақмола облысында дүниеге келіп, Алматыда білім алған. Ол майдан даласында Польшаны, Чехословакияны, Украинаны азат етуге қатысқан. Соғыстан кейінгі жылдары прокуратура органдарында қызмет атқарып, Қарағанды, Оңтүстік Қазақстан, Ақмола және Батыс Қазақстан облыстарында ұзақ жыл еңбек еткен.
Сонымен қатар президент 96 жастағы жергілікті өлкетанушы, мәдениет қайраткері Жайсаң Ақбаймен де кездесіп, әңгімелескен.
![Жайсаң Ақбай және Иван Гапич Жайсаң Ақбай және Иван Гапич](https://cdn.nur.kz/images/1120/55b8dd5d7d9c3f2f.jpeg)
"Сіздің еңбек жолыңыз – көпшілікке үлгі-өнеге. Партияда, мемлекеттік қызметте еңбек еттіңіз. Отандық мәдениет саласын дамытуға елеулі үлес қостыңыз. Сізге мықты денсаулық, отбасыңызға бақ-береке тілеймін", – дейді Қасым-Жомарт Тоқаев.
Жайсаң Ақбай Батыс Қазақстан облысының білім және мәдениет салаларында ұзақ жыл еңбек еткен. Сондай-ақ ол өңірде өлкетанушылық қызметімен танымал.
![Президент соғыс ардагері Иван Гапичтің үйінде Президент соғыс ардагері Иван Гапичтің үйінде](https://cdn.nur.kz/images/1120/62f75cad987b692b.jpeg)
Соғыс ардагері Иван Гапич пен еңбек ардагері Жайсаң Ақбай президентке алғыс айтып, ризашылығын білдірген.
Мақаланың түпнұсқасы: https://kaz.nur.kz/politics/2012305-bul-zasqa-zetu-ekinin-birinin-mandaiyna-zazylmaidy-toqaev-zuz-zasagan-sogys-ardagerinin-uiine-bardy-foto/