"Мемлекетіміз жаңа дәуірге қадам басты": Тоқаев Қазақстан халқын Наурыз мерекесімен құттықтады (фото, видео)
Жарияланған күні:
![Қасым-Жомарт Тоқаев Наурыз мейрамына арналған мерекелік іс-шарада сөз сөйлеуде Қасым-Жомарт Тоқаев Наурыз мейрамына арналған мерекелік іс-шарада сөз сөйлеуде](https://cdn.nur.kz/images/1120x630/b94bc52923abd629.jpeg)
Мемлекет басшысы Қасым-Жомарт Тоқаев "Тәуелсіздіктің 25 жылдығы" монументі жанындағы алаңда Наурыз мейрамына арналған мерекелік іс-шараға қатысып, сөз сөйледі, деп хабарлайды президенттің баспасөз қызметі Telegram-дағы ресми арнасында.
"Наурыз – жыл басы, халқымыз ежелден тойлаған көктем мерекесі. Бұл – халық асыға күтетін аса ерекше мейрам, қыстың ызғары қайтатын, көктем шуағын төгетін сәт. Табиғат түлеп, тіршілік қайта жаңаратын мезгіл.
Еліміз Әз-Наурызды әрдайым ырысты ынтымақтың бастауына балаған. Алыстаған ағайын Ұлыс күні татуласып, қайта қауышқан. Жұрт бір-біріне ақжарма тілектерін айтқан. Көпшілік ортақ дастарханнан дәм татып, қариялар жастарға батасын берген.
Бабаларымыз Наурыз тойын жасампаз еңбектің мейрамы санаған. Бұлақтың көзін ашып, ағаш отырғызған. Елге пайдасы тиетін игі істер атқарған. Бір сөзбен айтсақ, Ұлыстың ұлы күні – жаңа өмірдің жаршысы", - дейді президент.
Мемлекет басшысының сөзінше, бұл мейрамды халқымыз тұтас ел болып, бір ұлт болып түгел тойлайды.
"Наурыз кезінде бүкіл елге ортақ құндылықтар дәріптеледі. Яғни, Әз-Наурыз – нағыз халықтық мейрам. Бауырмалдық, жанашырлық, сыйластық, отаншылдық сияқты қасиеттің бәрі осы Ұлық мерекеде көрініс тапқан. Біз – ата жолын жалғаған жұртпыз", - дейді Қасым-Жомарт Тоқаев.
Өз сөзінде президент дәл бір жыл бұрын тың бастама көтеріп, Қазақстанды түбегейлі жаңғырту үшін ауқымды реформалар ұсынғанын атап өтті.
"Халық бұл бастамаларды қолдады. Біз жоспарымызды бір жылда табысты жүзеге асырдық. Референдум арқылы Конституцияға маңызды өзгерістер енгіздік. Билік жүйесін қайта жасақтау үшін маңызды саяси шаралар іске асырылды.
Кеше ғана өткен мәжіліс пен мәслихаттар сайлауы – бүкіл реформаларымызды алға бастайтын өте маңызды қадам. Бұл сайлау – ауқымды өзгерістердің лайықты жалғасы. Осылайша, мемлекетіміз жаңа дәуірге қадам басты. Жалпы, еліміздің жаңа саяси келбеті қалыптасты.
Тарихи сәт Ұлыстың ұлы күнімен тұспа-тұс келіп отыр. Мұның зор символдық мәні бар.
Жаңа Қазақстанның бүгінгі бейнесі Әз Наурызбен толық үндеседі, яғни Ұлыстың ұлы күнінде қасиетті Отанымыз мүлде жаңа сипатқа ие болды. Мұны дүние жүзінің көптеген елі мойындап отыр", - дейді мемлекет басшысы.
![Қасым-Жомарт Тоқаев Наурыз мейрамына арналған мерекелік іс-шарада сөз сөйлеуде Қасым-Жомарт Тоқаев Наурыз мейрамына арналған мерекелік іс-шарада сөз сөйлеуде](https://cdn.nur.kz/images/1120/8808348a614a6e50.jpeg)
Қасым-Жомарт Тоқаевтың айтуынша, енді саяси жүйесі толық жаңғырған еліміз тың қарқынмен дамиды.
"Бұл реформалар экономиканың өсуіне, халық табысының артуына жол ашады. Реформалар міндетті түрде жалғасын табады. Біз жан-жақты дамыған қуатты мемлекет боламыз! Бұл – негізгі мақсатымыз.
Азаматтарымыздың көзқарасы әр түрлі болғанымен, барлығының тілегі – бір. Бұл – елдің амандығы, мемлекеттің жарқын болашағы. Біз осы ортақ мақсат жолында бірлесіп еңбек етеміз.
Алда атқаратын жұмыс көп. Біз бір ел болып іске кіріссек, алынбайтын асу жоқ. Мен жасампаз халқымыздың келешегі жарқын болады деп сенемін. Мемлекеттің мүддесі – бәрінен биік.
Біз жастарымызға қамқор болып, оларға барынша жағдай жасаймыз. Мен жастарға сенемін! Оларға зор үміт артамын! Ел болашағы – өскелең ұрпақтың қолында. Ендеше, туған елімізді бірге дамытайық, ағайын!
"Бірлік түбі – береке" дейді халқымыз. Қоғамда келісім және татулық болса, еліміз көздеген мақсатына жетеді. Біздің мақсатымыз – айқын. Бұл – Әділетті Қазақстанды құру. Осы жолда бәріміз бір кісідей жұмылайық, ардақты ағайын!", - дейді президент.
Сондай-ақ мемлекет басшысы биыл қасиетті Рамазан айы Ұлыстың ұлы күнімен қатар келіп отырғанын атап өтіп, тілегін айтты.
"Биыл қасиетті Рамазан айы Ұлыстың ұлы күнімен қатар келді. Ораза ұстайтын жамағаттың ниеті қабыл болсын! Әр шаңыраққа қыдыр қонып, бақ дарысын! Жаңа жыл құт-береке әкелсін!Ұлыс оң болсын! Ақ мол болсын!", - дейді Қасым-Жомарт Тоқаев.
Мақаланың түпнұсқасы: https://kaz.nur.kz/politics/2013715-toqaev-qazaqstan-xalqyn-nauryz-merekesimen-quttyqtady/