Тоқаев Ақордада Германияның федералды президентін қарсы алды (фото)

Ақордада Германияның федералды президенті Франк-Вальтер Штайнмайерді салтанатты түрде қарсы алу рәсімі өтті. Бұл туралы президенттің баспасөз қызметі Telegram-дағы ресми арнасында хабарлады.

Президенттің баспасөз қызметінің мәліметінше, құрмет қарауылының бастығы екі елдің басшыларына рапорт берген. Осыдан кейін Қазақстан мен Германияның әнұрандары орындалған.

Айта кетейік, Франк-Вальтер Штайнмайер Қасым-Жомарт Тоқаевтың шақыруымен Қазақстанға мемлекеттік сапармен кеше, 19 маусымда келген еді.

Аса мәртебелі мейманды Астана әуежайында премьер-министр Әлихан Смайылов қарсы алды. Сапар аясында екі мемлекет басшылары Қазақстан-Германия стратегиялық серіктестігін нығайту мәселелері бойынша келіссөз жүргізіп, оның қорытындысы бойынша бірқатар екіжақты құжаттарға қол қояды деп жоспарланған.

Сонымен қатар Германия федералды президенті Қазақстан және Германия университеттері ректорларының форумында сөз сөйлеп, Қазақстан президентімен бірге қазақ-герман бизнес форумына қатысады деп күтілуде.