Дархан Ахмед-Заки Ғылым және жоғары білім вице-министрі болып тағайындалды

Үкімет қаулысымен Дархан Жұмақанұлы Ахмед-Заки Ғылым және жоғары білім вице-министрі болып тағайындалды. Бұл туралы үкіметтің баспасөз қызметі хабарлайды.

Ғылым және жоғары білім министрлігінің Ғылым комитеті ресми сайтындағы мәліметке сүйенсек, Дархан Ахмед-Заки 1981 жылы Шығыс Қазақстан облысында дүниеге келген.

Әл-Фараби атындағы Қазақ Мемлекеттік университетін, Қ. Сәтбаев атындағы Қазақ Мемлекеттік Техникалық университетін бітірген. Техника ғылымдарының докторы, профессор.

Еңбек жолын 2002 жылы Алматы қаласындағы Республикалық медицина колледжінде физика және математика пәндерінің оқытушысы болып бастаған.

2003 жылы Жаңаөзен қаласында "Қазақойл" ЖАҚ технологиялық зерттеулер орталығының инженер-бағдарламашысы болып жұмыс істеген.

2004-2012 жылдары – Әл-Фараби атындағы ҚазҰУ механика-математика факультетінің ассистенті, оқытушысы, аға оқытушысы, доценті, деканның оқу-тәрбие жұмысы жөніндегі орынбасары, "Информатика" кафедрасының меңгерушісі.

2012-2013 жылдары – Әл-Фараби атындағы ҚазҰУ механика-математика факультетінің деканы.

2013-2016 жылдары – Әл-Фараби атындағы ҚазҰУ оқу жұмысы жөніндегі проректор.

2016-2017 жылдары – Білім және ғылым министрлігінің Жоғары және жоғары оқу орнынан кейінгі білім департаментінің директоры.

2017-2020 жылдары – Халықаралық бизнес университетінің президенті.

2020 жылғы тамыздан бастап 2022 жылғы қазанға дейін Astana IT University ректоры болған.

2022 жылғы 1 қарашадан бастап бүгінгі күнге дейін Ғылым және жоғары білім министрлігі Ғылым комитетінің төрағасы қызметін атқарған.