Үкімет пен "АрселорМиттал Теміртау" қандай мәміле жасасып жатыр: министр пікір білдірді

Өнеркәсіп және құрылыс министрі Қанат Шарлапаев "АрселорМиттал Теміртау" акционерлік қоғамының меншік құқығын Қазақстан үкіметінің пайдасына заңды түрде беру бойынша жұмыс туралы егжей-тегжей айтып берді. Бұл туралы KAZ.NUR.KZ хабарлайды.

Қанат Шарлапаев қазіргі уақытта мемлекет басшысының тапсырмасына сәйкес "АрселорМиттал Теміртау" акционерлік қоғамының меншік құқығын Қазақстан үкіметіне заңды түрде беру бойынша жұмыс жүргізіліп жатқанын мәлімдеді.

"Мемлекет басшысының тапсырмасы бойынша "АрселорМиттал Теміртау" АҚ-ның қазіргі акционерлерін акционер қатарынан шығару туралы келіссөздер жүргізілді. Осы келіссөздердің нәтижесінде қазан айының соңында "АрселорМиттал Теміртау" АҚ-ның меншік құқығын Қазақстан Республикасының пайдасына беру шарттары туралы келісімдерге қол жеткіздік.

Бұл ақпарат "АрселорМиттал Теміртау" компаниясының қазіргі акционерлерінің жарияланымы арқылы да расталды. Қазір осы мәмілені заңды түрде ресімдеуді аяқтау бойынша жұмыстар жүргізілуде, және бұл процесс жақын арада аяқталады", - деді өнеркәсіп министрі Қанат Шарлапаев.