Асхат Хасенов ресми түрде "ҚазМұнайГаз" басшысы болып тағайындалды

Асхат Хасенов ресми түрде "ҚазМұнайГаз" басшысы болып тағайындалды. Бұл туралы KAZ.NUR.KZ компаниясының ресми сайтына сілтеме жасап хабарлайды.

Асхат Ғалымұлы Хасенов 28 мамырда өткен "ҚазМұнайГаз" ҰК АҚ акционерлерінің жылдық жалпы жиналысының қорытындысында тағайындалды.

Хасенов сондай-ақ "ҚазМұнайГаз" директорлар кеңесінің құрамына сайланды.

Сондай-ақ, ҚМГ Акционерлерінің жылдық жалпы жиналысының шешімімен ұлттық компанияның бұрынғы басшысы Мағзұм Мырзағалиевтің өкілеттігі мерзімінен бұрын тоқтатылды.

Асхат Хасенов еңбек жолын 2005 жылы "Торғай Петролеум" АҚ (Қызылорда қ.) мұнай және газ өндіру цехының 3-разрядтағы операторы болып бастаған.

2006 – 2010 жылдары "Мұнай және газ өнеркәсібінің бас диспетчерлік басқармасы" АҚ жетекші маман, бас маман, мұнай-газ кен орындарын игеру мониторингі бөлімінің бастығы, директордың орынбасары, департамент директоры, вице-президент болып жұмыс істеді.

2011 – 2019 жылдары еңбек жолын ҚР Мұнай және газ министрлігінде жалғастырып, Мұнай-газ кешеніндегі мемлекеттік инспекция комитетінің мемлекеттік инспекция және рұқсат беру басқармасын, кейін мұнай-химия және техникалық реттеу департаментін басқарды.

2019 – 2022 жылдары "KLPE" ЖШС Басқарма төрағасының орынбасары қызметін атқарды.

"ҚазМұнайГазға" тағайындалғанға дейін 2022 – 2024 жылдары аралығында ҚР энергетика вице-министрі болып қызмет етті. Бұл лауазымда жер қойнауын пайдалану және мұнай-газ химиясын дамыту мәселелеріне жетекшілік етті, сонымен бірге Көмірсутек кен орындарын барлау және игеру жөніндегі орталық комиссияны басқарды.

Бұған дейін Хасенов мемлекет басшысының қабылдауында болғанын жазған едік. Президентке компанияның биылғы бірінші тоқсанда атқарған операциялық және қаржылық қызметінің нәтижелері туралы есеп берілді. Президентке "ҚазМұнайГаздың" көптеген негізгі көрсеткіштер бойынша былтырғы осы кезеңмен салыстырғанда өсімге қол жеткізгені жөнінде баяндалған.