Астанадағы ШЫҰ саммиті қалай өтті

Ақорда Астанада өткен Шанхай ынтымақтастық ұйымының саммитінен фотосуреттерді жариялады. Саммит бүгін аяқталды, деп хабарлайды KAZ.NUR.KZ.

Бұл күндері Астана бірқатар елден жоғары мәртебелі меймандарды қабылдады. Бүгін, 4 шілдеде Қазақстан астанасында түрлі елдердің президенттері мен үкімет басшыларының қатысуымен өткен шара сегіз сағатқа жуық уақытқа созылды.

Саммит барысында ШЫҰ-ға мүше мемлекеттер басшылары кеңесіне қатысушылар Беларусь Республикасының Шанхай ынтымақтастық ұйымына кіруі туралы құжатқа ресми түрде қол қойды.

Сондай-ақ бүгін ШЫҰ-ға мүше мемлекеттер басшылары кеңесінде Астана декларациясына қол қойылды.

Бұдан бөлек, Қасым-Жомарт Тоқаев Қазақстанның ШЫҰ-ға төрағалығының қорытындысын шығарды. Мемлекет басшысы ШЫҰ достық, тату көршілік, теңдік және өзара қолдау көрсетудің "шанхай рухы" негізінде жұмыс істейтін мемлекетаралық қатынастардың тиімді тетігіне айналғанын атап өтті.

Сондай-ақ Қазақстанның бұрынғы қорғаныс министрі Нұрлан Ермекбаев ШЫҰ-ның 2025-2027 жылдарға бас хатшысы болып тағайындалғаны да белгілі болды.

Бұдан кейін мемлекет және үкімет басшылары "ШЫҰ плюс" форматында кездесті.

Астанада өткен ШЫҰ-ның "плюс" форматындағы саммитте Қазақстан басшысы Қасым-Жомарт Тоқаев ШЫҰ-ға мүше елдер арасындағы "өзара іс-қимылдың жаңа серпіні" бойынша бірнеше ұсыныс айтты.

Қазақстанның ШЫҰ-ға төрағалығы аяқталды – ол ҚХР-ға өтті. Қасым-Жомарт Тоқаев қорытынды сөз сөйлеп, ҚХР төрағасы Си Цзиньпинге қызметіне табыс тіледі.