Ақмола облысында екі аудан әкіміне қатаң сөгіс жарияланды

Ақмола облысы Ерейментау және Жарқайың аудандарының әкімдері Нұрлан Мұқатов пен Жанболат Хамитовқа қатаң сөгіс жарияланды. Бұл туралы облыс әкімдігінің баспасөз қызметіне сілтеме жасаған KAZ.NUR.KZ хабарлайды.

Ведомствоның Telegram-дағы ресми арнасында хабарланғандай, қоқыс шығару жұмыстары дұрыс жүргізілмегендіктен Ерейментау ауданының әкімі Нұрлан Мұқатовқа қатаң сөгіс жарияланды. Аудан орталығының көшелерінде егеуқұйрықтар мен антисанитарияның орын алуымен жағдай ушығып кетті.

Сонымен қатар Ақмола облысының әкімі Марат Ахметжановтың ауданды абаттандыру жөніндегі тікелей тапсырмасына да, БАҚ пен әлеуметтік желілердегі бірқатар жарияланымдардан кейін де аудан әкімдігі тарапынан тиісті назар аударылмады.

Облыс әкімінің өкімімен Нұрлан Мұқатовқа тәртіптік жаза қолданылды.

Сондай-ақ Жарқайың ауданының әкімі Жанболат Хамитовке Ақмола облысының әкімі Марат Ахметжановтың су тасқынының салдарын жою жөніндегі бірқатар тапсырмаларын тиісінше орындамағаны үшін қатаң сөгіс жарияланды.

"Жарқайың ауданының әкімдігі белгіленген мерзімде пәтерлер мен үйлер сатып алу, сондай-ақ су тасқынынан келтірілген мүліктік зиян үшін өтемақы төлеу жөніндегі жұмыстарды ұйымдастыруды аяқтамады, тұрғын үйге құқық белгілейтін құжаттарды уақытында қалпына келтіру мен рәсімдеуді қамтамасыз етпеді, соның салдарынан зардап шеккен отбасыларға үй сатып алу мерзімдері өзгерді", - делінген ведомство мәлімдемесінде.

Халықпен жүргізілетін алдын алу жұмысының осалдығы тұрғындардың наразылығына әкелді. Облыс әкімінің өкімімен Жанболат Хамитов тәртіптік жазаға тартылды.