Қырғызстан президенті Садыр Жапаров Астанаға келді

Қырғызстан президенті Садыр Жапаров Орталық Азия мемлекеттері басшыларының VI консультативтік кездесуіне қатысу үшін Астанаға келді. Бұл туралы үкімет Telegram-дағы арнасында хабарлады.

Қырғызстан президенті Астанаға Орталық Азия мемлекеттері басшыларының VI консультативтік кездесуіне және "Орталық Азия + Жапония" диалогы мемлекеттер басшыларының бірінші саммитіне қатысу үшін келді, онда интеграциялық үдерістерді одан әрі дамыту мәселелері талқыланады.

Өткен жылдың қорытындысы бойынша Қазақстан мен Қырғызстан арасындағы тауар айналымы 26%-дан астам өсті. Осы жылдың 5 айында өзара сауда көлемі 614,3 млн долларды құрады, бұл ретте қазақстандық тауарлар экспорты 6,7%-ға артты.

Қазіргі уақытта биылғы сәуір айында екі мемлекет басшылары қол қойған Қазақстан мен Қырғызстан арасындағы одақтастық қатынасты тереңдету және кеңейту туралы шарт ережелерін іске асыру бойынша үкіметтер деңгейінде бірлескен жұмыс жүргізілуде.

Атап айтқанда, сауда-экономикалық, көлік-логистикалық ынтымақтастықты арттыру, су-энергетика, ауыл шаруашылығы салаларындағы өзара іс-қимылды тереңдету жұмыстары атқарылуда.