"Қайын-жұрттан ұят": Шымкенттегі сән апталығына Кәуменова қалай дайындалды?

Еліміздің үшінші мегаполисінде Астана, Алматы, Ақтау жəне Шымкент қалаларының дизайнерлері бас қосты. Шырайлы қалада алғаш рет өткен "Kazakhstan Fashion Week" апталығы туралы өңірдегі NUR.KZ тілшісі хабарлайды.

Бұл кеште шымкенттік сəнқой қыз-келіншектер өздеріне ұнаған сəнгерлердің туындыларын киіп көру және сатып алу мүмкіндігіне ие болды.

Сұлулық пен əдемілік салтанат құрған сəн апталығын Шымкенттегі "Сұлумоделс" сəн агенттігі ұйымдастырған.

Агенттік басшысы Ақжамал Əбілдаева Қазақстанның үшінші мегаполисі атанған қала үшін бұл қажет шара екенін алға тартты.

"Алматы қаласында өтетін "Қазақстан фэшн уик" кезінде сахнаның сыртында қарап тұрушы едік ылғи. Шымкент үшінші мегаполис атанды. Мəртебесі өскен қаламызға мұндай мəдени іс-шара қажет-ақ.

Аида Кәуменова, Динара Сәтжан, Наиль Байкучуков, Алексей Джен секілді сəнгерлермен қоса шымкенттік дизайнерлердің де топтамасы ұсынылды", - деді басшы.

Аталмыш шараның қонақтары отандық танымал сəнгерлер мен жас дизайнерлердің жаңа топтамаларымен танысып қана қоймай, өз қалталарына қарай киімдерді сатып алып та жатты.

Айта кетерлігі, Аида Кəуменова Шымкентте өткен сəн апталығына тыңғылықты дайындалған. Өйткені қайын-жұртының алдында ұятқа қалғысы келмепті.

Жалпы, шырайлы қалада тұңғыш рет өткізілген сəн аптағында қонақтар 15 дизайнердің туындыларын тамашалай алды.

Динара Сəтжан болса шымкенттік сылқымдарға Əмина Өмірзақованың құрметіне арнаған топтамасын ұсынды.