Қазақ жігіті танымал әнші Рианнаның бейнероликтерінің редакторы болды (видео)

Қарағандылық монтаждау редакторы және саунд-дизайнер Әділхан Дүйсембаев R&B және поп-музыка орындаушысы Рианнаның промороликтерімен жұмыс істеген. Оның жұмыс нәтижесі тапсырыс беруші BRTHR студиясына ғана емес, әншінің де көңілінен шыққан. Бұл жайлы Қарағанды облысы әкімдігінің ресми сайты хабарлады, деп жазады KAZ.NUR.KZ.

Әділхан Дүйсембаев бұл салаға жаңа келген маман емес. Ол 10 жылдан бері фото және видео түсірумен, сондай-ақ монтаждаумен айналысады. Snipes және Levi's сияқты танымал брендтермен жұмыс істеген. Биыл қазақстандық брейкдансер Николай Черников туралы деректі фильм түсірді.

Рианнаға арналған бейнелерді монтаждау тапсырысы Әділханға шоу-бизнес жұлдыздарымен бұрыннан жұмыс істеп келе жатқан BRTHR студиясынан түседі.

"Мен Savage x Fenty Show үшін промороликтермен жұмыс істедім. Бұл Рианна брендінің жыл сайынғы сән көрсетілімі туралы арнайы американдық телевизиялық шығарылым. BRTHR студиясының режиссерінен тапсырма алдым және олар маған толық еркіндік берді.

Таңертеңнен кешке дейін екі апта бойы жұмысты уақытында аяқтау үшін үйден шықпай еңбек еттім. Бұл Рианнаға арналған екінші бейнеролик. Сондай-ақ, осы жобаға арналған жарнамалық роликті монтаждадым", – дейді Әділхан.

Жас жігіттің мамандандырылған білімі жоқ. Оның айтуынша, алдымен фотоға, содан кейін видео түсіруге қызығушылығы оянған.

"Қазір интернеттің көмегімен бүкіл әлемге мәлімдеме жасауға мүмкіндік бар. Тек өз ісіңе сеніп, оны сүю керек", – деп есептейді Әділхан.

Айта кетейік, Рианнаның роликтерімен жұмыс істегеннен кейін қарағандылық азаматқа жаңа жобаларға ұсыныс түскен.