"Қазір бәрі қажы": Бағлан Әбдірайымов "Жігіттер" тобындағы достарының жас кезіндегі қызықтарын еске алды (фото)

Әнші Бағлан Әбдірайымов "Жігіттер" тобындағы достарының көзі көгеріп, тісі сынған сәттер жайлы айтты. Өнер иесі күніне 2000 теңге табатын күндеріне еске алды, деп жазады KAZ.NUR.KZ.

Жас кезіндегі естеліктерін әнші Instagram желісіндегі парақшасында жариялады.

"Еңбек жолымды 2001 жылы, кафеде музыкант болып бастадым. Ол кезде бір әнге тапсырыс беру құны - 200 теңге болатын. Сол кездері күніне аз дегенде 2000 теңге табатынбыз. Алатын степендия - 3500 теңге. Күндіз - оқу, түнде - жұмыс.

Бір кісідей бұзық едік. Кафеге келген талай адам жағадан алып, мазаны алатын. Ердостың тісі сынып, Еркіннің көзі көгеріп, Айдар гитарасын құшақтап, талай тепкіден де өткенбіз. Үшеуіне мен қарайтынмын. Еркін ерегісіп, мені төбелестіреді. Айдар мен Ердос ілініп қалатын. Қанатын қатайтып, адам қатарына қостық қой, әйтеуір. Қазір ғой бәрі - қажы. Бала болсақ та, шын дос болдық. Сол достықтың арқасында 2000 жылдан бері, бір нанды бөлісіп жеп жүрміз. Кейін Еркін икра қосылған нан жегісі келіп кетті. Уақыт өте нанды бөлек жесек те, дастарқан бір болды", - деді.

Еске сала кетейік, "Жігіттер" тобының құрылғанына былтыр 20 жыл толды. Бұған дейін квартеттің бұрынғы мүшесі Еркін Нұржанов топтан кету себебін айтқан болатын.